Այս տարի, մեր երկրի տուրիզմի ոլորտի պատասխանատուների հույսերը՝ կապված իրանցի զբոսաշրջիկների հետ, չարդարացան: Նրանց կանխատեսմամբ, այս տարի Իրանից, ամենաքիչը 30 հազար տուրիստ պետք է իրենց հանգիստը կազմակերպեր Հայաստանում, սակայն վիճակագրությունը փաստում է, որ նրանց թիվը, նախորդ տարվա առաջին եռամսյակի հետ համեմատած, 10 հազարով նվազել է: Փոխարենը, իրանցիները Հայաստանով անցնում, գնում են Վրաստան`գերադասելով հանգստանալ ավելի մատչելի ու ժամանակակից ծառայություններ մատուցող Վրաստանում:
Aravot.am-ը ՀՀ Էկոնոմիկայի նախարարության զբոսաշրջության եւ տնտեսական զարգացման վարչության պետ Մեխակ Ապրեսյանից հետաքրքրվեց, թե գուցե բավարար հյուրընկալ չե՞նք կամ էլ տուրիստական փաթեթներն ու ծառայությունները թանկ են ու այլեւս չեն գրավում իրանցիներին՝ վարչության պետն այդ նկատելի անկումը պայմանավորեց Իրանում տեղի ունեցած տնտեսա-քաղաքական իրավիճակով. «Իրանի նկատմամբ կիրառված պատժամիջոցների հետ կապված Իրանում տարադրամի իրարանցում է եղել: Ընդհանրապես Իրանից արտագնա զբոսաշրջությունը զգալի անկում է ապրել»: Ինչ վերաբերում է նախապատվությունը Վրաստանին տալուն, պարոն Ապրեսյանի պատասխանը` տեսանյութում:
Լուսինե ԲՈՒԴԱՂՅԱՆ
