Առաքել Միրզոյան
Ի տարբերություն այլ մարզաձեւերի, ծանրամարտում օլիմպիական ուղեգրերը անհատական չեն եւ տվյալ ազգային ֆեդերացիան է որոշում, թե ո՞ր քաշային կարգում ո՞ր ծանրորդը կմասնակցի օլիմպիական մրցաշարին:
Ծանրամարտի Հայաստանի տղամարդկանց ազգային հավաքականն աշխարհի վերջին երկու առաջնությունների հանրագումարով ձեռք է բերել Լոնդոնի օլիմպիական խաղերի չորս վարկանիշ: Եվ քանի որ այդ չորս տեղերին միանգամից հավակնում էր առնվազն յոթ-ութ ծանրորդ, որոնք նախապատրաստական փուլի ողջ ընթացքում գտնվել են ուսումնամարզական հավաքներում եւ լրջորեն մարզվել, ֆեդերացիան վերջերս անցկացրեց ստուգողական փորձամրցում, որի ժամանակ ծանորդները պայքարում էին ոչ թե մրցակիցների, այլ՝ իրենք իրենց հետ եւ պիտի ցույց տային իրենց ողջ ունակությունները: Ընդ որում, ընտրվելու էին միայն այն մարզիկները, որոնց բարձրացրած կիլոգրամները կհամապատասխանեն Լոնդոնում մեդալների համար պայքարելու պահանջներին:
Այսօր ֆեդերացիայի նախագահ Սամվել Խաչատրյանն «Aravot.am»-ին տեղեկացրեց, որ հավաքականի մարզիչներն արդեն կողմնորոշվել են: Ամառային 30-րդ օլիմպիական խաղերում մրցահարթակ կմտնեն.
69 կգ. Առաքել Միրզոյան
77 կգ. Տիգրան Մարտիրոսյան
85 կգ. Արա Խաչատրյան
94 կգ. Նորայր Վարդանյան
Սամվել Խաչատրյանը տեղեկացրեց նաեւ, որ որպես պահեստային օլիմպիական թիմի հետ մարզվում է նաեւ 69 կգ քաշային Վանիկ Ավետիսյանը:
Աշոտ ՀԱԿՈԲՅԱՆ
