Հուլիսի 3-ին արտակարգ դեպք է տեղի ունեցել Երևանում: Ինչպես տեղեկանում ենք Tert.am-ից` ժամը 15-ի սահմաններում Կոտայքի մարզի Զովունի գյուղի բնակիչ Ալիխան Կարոյանին պատկանող 3 տարեկան Ռեմբո անունով ցուլը, կատաղելով և պոկելով պարանը, Զովունիից հասել է մինչև Երևանի Դավիթաշեն թաղամաս: Բայց մինչ այդ ցուլը նախ հարձակվել է տիրոջ վրա, ապա մի քանի պտույտ տվել գյուղի կենտրոնում, հարձակվել գյուղացիների վրա: Ֆոտոլրագրող Գագիկ Շամշյանին ցուլի տերը` Ա. Կարոյանը, պատմել է, որ ինքը մահից է պրծել, իր ընկերների հետ հազիվ է կարողացել ցուլին «պահել», որպեսզի նա ոչ մեկին չվնասի:
Այնուամենայնիվ, ցուլին հաջողվել է հասնել Դավիթաշեն, և այն որոշ ժամանակ անցկացրել է թիվ 195 և 196 դպրոցների մարզահրապարակում:
Դեպքի վայր հրավիրված Արտակարգ իրավիճակների նախարարության եւ Կենդանաբանական այգու աշխատակիցները վնասազերծել են ցուլին: Վերջիններիս հաջողվել է հատուկ քնեցնող միջոցով 3 կրակոցով քնեցնել ցուլին, որին ավելի ուշ քարշակ մեքենայի միջոցով տեղափոխել են գոմ:
