ՀՀ Սահմանադրական դատարանը այսօր գրավոր ընթացակարգով վերսկսեց մայիսի 6-ին ՀՀ Ազգային ժողովի մեծամասնական ընտրակարգով թիվ 7 ընտրատարածքից պատգամավորության թեկնածու Նիկոլ Փաշինյանի դիմումի հիման վրա գործի քննությունը: Զեկուցողը ՍԴ անդամ Մանուկ Թոփուզյանն էր, իսկ պատասխանող կողմը՝ թիվ 7 ընտրատարածքային ընտրական հանձնաժողովի նախագահ Գեղամ Սարգսյանը եւ Կենտրոնական ընտրական հանձնաժողովի իրավաբանական վարչության պետ Նունե Հովհաննիսյանը: Նիկոլ Փաշինյանի ներկայացուցիչն էր ՀՀ փաստաբանների պալատի անդամ Վահե Գրիգորյանը: Հիշեցնենք, որ հունիսի 15-ին ՀՀ սահմանադրական դատարանում քննության պետք է առնվեր այս գործը, սակայն դատարանը որոշում կայացրեց՝ ՀՀ գլխավոր դատախազությունից, վարչական դատարանից եւ ԿԸՀ-ից պահանջելով տեղեկատվություն: Նիկոլ Փաշինյանը խնդրել էր անվավեր ճանաչել թիվ 7 ընտրատարածքում մեծամասնական ընտրակարգով ընտրության արդյունքների մասին ԸԸՀ մայիսի 11-ի որոշումը եւ այդ տարածքում պատգամավոր ընտրված ճանաչել իրեն: Նշենք, որ այդ տարածքում պատգամավոր է ընտրվել Հանրապետական կուսակցության կողմից առաջադրված Սամվել Ալեքսանյանը: Դատարանը խորհրդակցական սենյակ է մտել որոշում կայացնելու:
Ռուզան ՄԻՆԱՍՅԱՆ
