Aravot.am-ը ԱԺ ՀԱԿ խմբակցության քարտուղար Արամ Մանուկյանի հետ զրույցում խնդրեց մեկնաբանել ՀՀԿ-ական պատգամավոր Խոսրով Հարությունյանի այն դիտարկումը, թե ՀԱԿ-ը սիրաշահում է ԲՀԿ-ին՝ նրա կապիտալը՝ ընտրազանգվածը օգտագործելու համար: Այս կապակցությամբ Ա. Մանուկյանն ասաց. «Խորհրդարանում երեք հոգի կան, երեք սոխակները, որոնց ես չեմ պատասխանում: Նրանցից մեկը Խոսրով Հարությունյանն է, մյուս երկուսը` Արտաշես Գեղամյանն ու Հայկ Բաբուխանյանը»:
Մեր դիտարկմանը, թե նման տպավորություն ոչ միայն Խ. Հարությունյանն ունի, ՀԱԿ խմբակցության քարտուղարն այսպես արձագանքեց. « Լևոն Տեր-Պետրոսյանի ելույթը հարկավոր է ուշադիր և մանրամասնորեն կարդալ եւ տեսնել, որ դա զուտ ակտուալ, քաղաքական, Հայաստանի իրավիճակին սազական քաղաքական ելույթ է: Հենց այս ուղղությամբ էլ ՀՀ քաղաքական դաշտն աշխատում է: Ցանկացած ուժ, քաղաքական միավոր, որ այսօր կգործի մեզ նման, կքվեարկի այս իշխանություններին , այս կիսաընտրված, կիսահանցագործ իշխանություններին դեմ, մենք նրա հետ այդ դաշտում այդ փուլում կհամագործակցենք: Այսօր այդ դաշտում են ԲՀԿ-ն Դաշնակցությունը, «Ժառանգությունը»: Մենք կփորձենք ընդարձակել, այս ուժը շատացնել, քանի որ միայն այդ դեպքում է, որ կարող ենք այս իշխանություններին զգոնացնել, բերել արդարության դաշտ, որ հաշվի նստեն ժողովրդի կարծիքի հետ, որը ամենևին էլ մեկ քաղաքական ուժին մյուսին չի կապում»: Քաղաքական ուժին օգտագործելու «մասով» էլ Ա. Մանուկյանը նշեց. «Օգտագործելու խնդիր չէ, շահերի համընկնման խնդիր է: Քաղաքականությունը հնարավորի արվեստ է: Եթե հնարավորինս շատ մարդիկ քվեարկում են քեզ նման , ուրեմն դու հաջողության ես հասնում: Իսկ դիվանագիտության ոսկե կանոնն է այն, որ դու ուժեղ ես այնքան, որքան բարեկամներ ունես և թույլ ես այնքան, որքան շատ թշնամիներ ունես: Շատ կողմնակիցներ ունեցող քաղաքական ուժը խելոք քաղաքական ուժ է»:
Տաթև ՀԱՐՈՒԹՅՈՒՆՅԱՆ
