Այսօր Ազգային անվտանգության խորհրդի քարտուղար Արթուր Բաղդասարյանի և Հայաստանում ԵՄ պատվիրակության ղեկավար Տրայան Հրիստեայի համանախագահությամբ տեղի է ունեցել Եվրամիության խորհրդատվական խմբի Խորհրդի հերթական` տասներորդ նիստը: Նիստին մասնակցում էին ՄԱԶԾ մշտական ներկայացուցիչ Դաֆինա Գերչևան, Հայաստանում հավատարմագրված ԵՄ երկրների դեսպանները և եվրոպական կառույցների ղեկավարները, ինչպես նաև ՀՀ պետական գերատեսչությունների ներկայացուցիչներ: Նիստի ընթացքում քննարկվեց և հավանության արժանացավ ԵՄԽԽ 2012թ. երկրորդ կիսամյակի աշխատանքային ծրագիրը:
Բացման խոսքում ԱԱԽ քարտուղար Արթուր Բաղդասարյանը դրական գնահատեց ՀՀ-ԵՄ համագործակցության ներկայիս մակարդակը: “Բավականին հաջող ընթացք ունի ՀՀ-ԵՄ քաղաքական համագործակցությունը, տնտեսական համագործակցությունը արդարադատության, ազատության և անվտանգության ոլորտում տեղի ունեցող զարգացումները: Դրական առաջընթաց ունենք վիզաների դյուրացման և խորը և համապարփակ առևտրի բանակցություններում: ՀՀ-ԵՄ 2012-2013թթ. ծրագրով նախատեսվում են բավականին լուրջ բարեփոխումներ, շուրջ տասը նոր ռազմավարություն և յոթ հայեցակարգ, որոնք վերաբերում են ՀՀ ոստիկանության համակարգին, մաքսային համակարգին, մարդու իրավունքների պաշտպանության խնդիրներին, տնտեսության և նաև առանձին ոլորտներին և ենթակառուցվածքներին”,- ընդգծել է Արթուր Բաղդասարյանը: ԱԱԽ քարտուղարը նաև տեղեկացրել է, որ առաջիկայում ԱԱԽ նիստում կքննարկվի ՀՀ-ում մարդու իրավունքների պաշտպանության ազգային ռազմավարությունը, որը մշակվել է ԵՄ խորհրդատուների ներգրավվածությամբ և կարևորել է այլընտրանքային պատիժների մշակման ռազմավարությունը և Հայաստանում պրոբացիոն ծառայության հիմնումը:
ԵՄ պատվիրակության ղեկավար Տրայան Հրիստեան, դրական գնահատելով ՀՀ-ԵՄ համագործակցության ընթացքը, վերահաստատեց ԵՄ պատրաստակամությունը Հայաստանի հետ տնտեսական ինտեգրման և այլ ոլորտներում հետագա փոխգործակցության խորացման գործընթացում:
Նիստի ընթացքում Խորհուրդը հաստատեց 2012թ. հուլիս-դեկտեմբեր ամիսների աշխատանքային ծրագիրը, որով նախատեսվում է օժանդակություն և քաղաքականության հարցերով խորհրդատվություն տրամադրել պետական կառավարման, արդարադատության, ազատության և անվտանգության, ինչպես նաև ժողովրդավարության և մարդու իրավունքների ոլորտներում: Ի լրումն, ԵՄ խորհրդատուները կշարունակեն ակտիվորեն ներգրավվել ԵՄ մուտքի արտոնագրերի դյուրացման և ռեադմիսիայի բանակցային գործընթացում:
ԱԱԽ մամուլի գրասենյակ
