ԱԺ պատգամավոր Ռուբեն Հայրապետյանի թիկնազորի կողմից ծեծելով սպանված Վահե Ավետյանի մահը սգում են ողջ հանրապետությունում: Այսօր Շիրակի մարզի սահմանամերձ գյուղերից մեկի` Անիի տարածաշրջանի Գուսանագյուղի բնակիչները, որոնք ահռելի պարտքերի տակ են հայտնվել Ռուսաստանից ներկրված ցորենի էլիտար սերմացուի անորակ լինելու պատճառով, լրագրողներին տեսնելուն պես, ամեն ինչ մի կողմ դրած, զայրացած խոսում էին օլիգարխներից ու իրենց ձևակերպմամբ՝ նրանց «շներից»: «Ովքեր որ էդ բժշկին սպանել են, ճիշտ կանեն էդպիսի մարդկանց ոչ թե բռնեն, 10 կամ 20 տարի տան, հետո էլ ծանոթ մեջ գցեն ազատվեն- գան, այլ գնդակահարեն, կախաղան հանեն` ժողովրդի աչքի առաջ: Թե չէ՝ պտի գնան, մի քանի տարի նստեն, փողով դուրս գան բանտից, էլի էս երկրի օդը շնչեն, իսկ էդ մարդու կյանքը ջահել-ջահել գնաց: Հասկացանք, որ փողատեր են, հարստությունը չկորցնելու վախից թիկնապահ են պահում, բայց սրանք թիկնապահներ չեն, այլ մեկ-մեկ հատ գազան են: Մենք մեր երկրի մեջ ապահովված չենք, ով որ սովետին փնովում էր, ասում էին, թե էն ժամանակները շատ մարդ էին սպանում, հիմի ավելի շատ են սպանում, աչքներիս դեմը սպանում են: Ինչի՞ են ուզում պատգամավոր դառնալ, որպեսզի պետությանը ոչ հախերը տան, ոչ էլ բռնվելուց ու պատժվելուց վախենան, իրանց վրա բռնել-մռնել չի ազդում: Քանի դեռ էս կառավարությունը կա` հանրապետական է, ինչ է, քանի գնանք, պտի գլորվինք ձորը», -հիասթափված ասում էին գյուղի եկեղեցու տակ թղթախաղով զբաղված տարեցները:
Նունե ԱՐԵՎՇԱՏՅԱՆ
