Ամռան ընթացքում եւ ընդհանրապես, ռադիոհաղորդավարուհի Լուսինե Բադալյանը խորհուրդ է տալիս շատ կարդալ: «Կարդալն ընդանհրապես մեծ հաճույք է ու մեծ օգուտ, նույնիսկ եթե չես հիշում կարդացածդ գրքի բովանդակությունը, բայց այն իր հետքը թողնում է անպայման, հղկում է աշխարհայացքդ, նոր հորիզոններ է բացում»: Դժվարանում է որեւէ խորհուրդ տալ, քանի որ, ըստ հաղորդավարուհու երաժշտությունն ու գիրքը մարդն ընտրում է՝ ելնելով իր ներաշխարհից: Այս ամառ նա պատրաստվում է ընթերցել Մ. Ռեմարկի «Գիշերը Լիսսաբոնում» և « Ստվերները Դրախտում» գրքերը: « Եթե դեռ կա մեկը, ով չի ընթերցել Ռեմարկի « Հաղթական Կամարը», խորհուրդ եմ տալիս անպայման կարդալ: Ես այդ գրքից հետո ուղղակի երազում եմ լինել Փարիզում, զբոսնել Հաղթական Կամարի շրջակայքում ու անցնել այն հյուրանոցի մոտով, ուր ծավալվում են իրադարձությունները: Սիրահարվել էի Ռեմարկի « Жизнь в займы» գրքին: Որոշակի իմաստով կյանքիս որոշակի փուլի աշխարհընկալումը փոխեց ու ինձ օգնեց Պաոլո Կոելիոյի « Զաիր» գիրքը»: Նա շատ է սիրում Սոմերսեթ Մոեմ (The Painted Veil), Գի դե Մոպասան, եւ հատկապես ՝«Մահվան պես հզոր» գիրքը խորհուրդ է տալիս կարդալ: Հաղորդավարուհին հիշում է, թե ինչպես էին ուսանողական տարիներին ընկերուհիներով ընտրում գիրքն ու կարդալով փոխանցում միմյանց եւ վերջում քննարկում. «Մինչև հիմա էլ նույնն ենք անում, բայց եթե առաջ գիրքն ավարտում էինք 3 օրում, այսօր բոլորս ունենք երեխաներ, հոգսեր ու ժամկետներ չենք դնում»:
«Ես սիրում եմ կարդալ տարբեր ժանրի գրքեր՝ աստղերի կենսագրություններ, սիրավեպեր, դետեկտիվ եւ վավերագրական գրքեր»,-ասում է երգչուհի Ջուսը: Ամռանն աղջիկներին երգչուհին խորհուրդ է տալիս ծովափին նստած կարդալ Մարգարետ Միտչելի «Քամուց քշվածներ» վեպը: Ջուսն այն համարում է հրաշալի գիրք, որը կարդալուց ուղղակի տարվում ես. «Այնտեղ կա մի հերոս Ռեթ Բաթլերը, ով ինձ միշտ հիացրել է իր տղամարդկությամբ եւ խելացիությամբ, եւ թե ինչպես է զգում կնոջը: Դե հերոսուհին էլ ինձ հիացրեց իր ուժեղ լինելով»: Իսկ տղամարդկանց, ովքեր սիրում են վավերագրական գրքեր, խորհուրդ է տալիս կարդալ Ջեյմս Ռեյի «Հաջողության գաղտնիքը»: «Այս գրքում գրված է, թե ինչպես յուրաքանչյուր մարդ կարող է հասնել իր դրած նպատակին»: Ջուսը խոստովանում է, որ այդ գիրքը միշտ իր սեղանին է լինում եւ նա զգում է այդ գրքի կարիքը, իսկ անհրաժեշտության դեպքուվ վերընթերցում:
Մի միջադեպ է գրանցվել, որից հետո Ջուսն այլեւս բժշկական գրքեր չի կարդում. «Ես կարդում էի բժշկական գիրք, թե կոշտուկների քանի տեսակ կարող է լինել ձեռքերի վրա: Այնքան էի տարվել գրքով, որ զգացի ձեռքերս վառվում են: Երբ նայեցի տեսա, որ կարմիր լաքաներ են հայտնվել ձեռքերիս վրա: Մայրս միանգամից ասեց, որ մի կողմ դնեմ այդ գիրքը, քանի որ ինձ չի կարելի կարդալ այսպիսի բաներ եւ այդ ժամանակից սկսած, այլեւս բժշկական գրքեր չեմ կարդում»,-պատմում է Ջուսը:
Իսկ երգիչ Վլադիրմիր Բարխոյանը խորհուրդ է տալիս մարդկանց կարդալ իրենց հոգու գիրքը. «Մարդիկ մոռացել են, թե որոնք են մարդկային արժեքները, ինչ է ընկերությունը, եւ ինչ է սերը»,-ասում է երգիչը:
Քրիստինա Միրզոյան
