Այսօր Aravot.am-ի հետ զրույցում ազգագրագետ Արտաշես Բոյաջյանն ասաց, որ ինքը համաձայն չէ վերջերս հաճախակի հնչող այն կարծիքների հետ, թե Գյումրին կրիմինալ քաղաք է: «Բոլոր տեղերում էլ էդ հանցագործությունները լինում են, հանցագործներ կան, բայց մենք չենք պիտակավորում, որ այդ բնակավայրը հանցագործների քաղաք է: Չեմ ընդունում, որ մեր ամբողջ քաղաքին պիտակ կպցնեն, անխոս կան հանցագործներ,կարող է մեր մոտ հանցագործությունը մի քիչ շատ լինի, կամ քիչ լինի, կան կերպարներ, որոնց անունը անընդհատ շահարկվում է, բայց դա գյումրեցուն բնորոշ չէ: Աղքատ քաղաք է, անտեսված քաղաք է, դե սոված մարդը ինչ պետք է անի .կամ պիտի թողնի արտագաղթի կամ ինչ որ տեղից ինչ-որ բան փախցնի: Ժողովրդական խոսք կա, ասում է` մուկը իրենից բան չի ներկայացնում, բայց որ ընկնում է կարասը, ամբողջ էդ յուղը փչացնում է, այսինքն մի հիմար, մի վատ մարդ հանցագործություն է կատարում, ամբողջ քաղաքի անունը ելնում է: Չի կարելի էդ ձևակերպումը տալ, թե Գյումրին կրիմինալ քաղաք է, օրինակ` ինձ համար վիրավորական է, որովհետև ես էլ եմ գյումրեցի: Ռուսական հոգեբանություն է, որ անպայման երկրորդ քաղաքները պետք է կրմինալ քաղաք լինեն, օրինակ ասենք Ամերիկայի համար ` Չիկագոն է կրիմինալ, Ռուսաստանի համար Պետերբուրգը, Մեքսիկայում սահմանի վրա գտնվող ինչ-որ քաղաք կա, դա է կրիմինալ, ոնց որ դա հատուկ մշակված ծրագիր լինի, որը շրջանառության մեջ են դնում, բայց մենք այդպիսին չենք»,- վստահեցնում է մեր զրուցակիցը:
Նունե ԱՐԵՎՇԱՏՅԱՆ
