Քաղաքական տեխնոլոգիաների մասնագետ Կարեն Քոչարյանին «Հարսնաքարում» ծեծի հետեւանքով երեկ մահացած Վահե Ավետյանի դեպքը համոզում է, որ հասարակության իմունիտետն ընկել է ու մարդիկ անտարբեր են դարձել: «Հասարակության մեջ էթիկետի տարրական շփումն ու կուլտուրան իսպառ վերացել է: Խորհրդային դպրոցից, մանկապարտեզից երեխաներին սովորեցնում էին իրենց ոնց պահել … Հիմա ապրում ենք ջունգլիների օրենքով, ազգը մաուգլի է դարձել»,- այսօր «Սլաք» ակումբում ասաց պարոն Քոչարյանը : Նրա կարծիքով, լավ է, որ դպրոցում շախմատ են սովորեցնում, բայց ավելի լավ կլիներ աշակերտներին էթիկետի կանոնները որպես առանձին առարկա դասավանդեին.« Ի՞նչ է նշանակում «ախրանա», ումի՞ց են վախենում այդ պատգամավորները, իրենց ընտրած ժողովրդի՞ց»: Քաղաքական մեկնաբան Մենուա Հարությունյանն էլ այն կարծիքին է, որ հասարակությունը փոխվում է ու մարդիկ արդեն չեն վախենում իրենց տեսակետներն արտահայտելուց.« Կարծում եմ, որ թիկնազոր որեւէ մեկը չպետք է ունենա, եթե որեւէ մեկն ունենում է, ստիպված ես դու էլ ունենաս, որովհետեւ փողոցում դու հանդիպում ես մարդկաց, որոնք թիկնազորը մեջքին պահած, արդեն ագրեսիվ են իրենց պահում: Վահեն պետք է կերպար դառնա, որովհետեւ յուրաքանչյուրս կարող էինք Վահեի տեղը լինել»: Նրա կարծիքով, նման դեպքերը օրենքով պետք է պատժել, հակառակ դեպքում վրեժն է պատժելու. «Այդ տղայի երկու տղաները, եթե 20 տարի հետո հանկարծ վրեժ լուծեցին, փաստի առաջ ենք կանգնելու, չենք իմանալու այդ տղաներին ոնց դատել: Ժամանակին Ալրաղացի Լյովիկի թիկնազորն էլ одноклассники սրճարանում մարդ սպանեց, գնաց նստեց, դուրս եկավ, բայց կարծում եմ, օրենքը պետք է խնդիրը դնի ոչ թե թիկնազորին պատժելու վրա, այլ տերերը պետք է պատասխան տան, որովհետեւ եթե թիկնազորին պատժում ես, տերը նորից ուրիշին է վարձում ու խնդիրներ լուծում»: Պարոն Քոչարյանն էլ զարմանում է, Արցախում օրը ցերեկով բարձրաստիճան պաշտոնյաները շրջում են ազատ՝ առանց թիկնազորի. « Երեկոները հրապարակում ման են գալիս պատգամավորներ, Ազգային ժողովի նախագահ, բոլորը… որեւիցե մեկի կողքին գոնե նմուշի համար 1 ախրանիկ, բուլտերիեր, ես իմ ինչ, չեմ նկատել: Այդ մարդիք ամենավտանգված տեղում են ապրում: Մեր պարագայում ախրանիկը ֆասի առարկաներ են, որովհետեւ կենդանիներ են մեծանում»:
Արփինե ՍԻՄՈՆՅԱՆ
