ԵԽԽՎ-ն ընդունեց այսօր մի բանաձեւ, որով դատապարտում է որպես քաղաքական դիրքորոշումների համար պատիժ՝ ազատ տեղաշարժի սահմանափակումը:
Բանաձեւում ընդգծելով ազատ տեղաշարժի եւ խոսքի ազատության միջեւ կապը՝ Վեհաժողովը նշում է, որ Եվրոպայի խորհրդի անդամ որոշ պետությունները չարաշահում են իրենց օրինական իրավունքը՝ արգելել կամ թույլատրել մուտքն իրենց տարածք, որպես պատիժ քաղաքական կամ գաղափարական դիրքորոշման համար: Հետեւելով զեկուցողի՝ Թուրքիայի պատվիրակ Հալուկ Կոչի առաջարկներին՝ ԵԽԽՎ-ն դատապարտեց այս երեւույթը:
Ի դեպ, զեկույցի քննարկման ընթացքում Ֆրանսիայի պատվիրակ Ֆրեդերիկ Ռեյսը ելույթում նկատեց, թե տեղաշարժի ազատության նկատմամբ պատժամիջոցները լայնորեն տարածված են եւ որպես օրինակ հիշեցրեց, թե Ադրբեջանը սեւ ցուցակ է գցում բոլոր նրանց, ովքեր այցելել են Լեռնային Ղարաբաղ, եւ շատերը կարիք են ունենում բազմաթիվ անձնագրերի, քանի որ այդ երկիրը կարգելի այն անձանց մուտքը, որոնք այցելել են ԼՂ:
