Ավարտվեց Վայոց Ձորի մարզում Orange Հիմնադրամի և Հայկական ակնաբուժության նախագծի (ՀԱՆ) համատեղ ծրագիրը, որի նպատակն էր մարզի բնակիչների համար անցկացնել անվճար ակնային զննումներ և իրականացնել բուժումներ սոցիալապես անապահով անձանց համար:
Ծրագրի շրջանակներում 1,181 մեծահասակներ անցել են ակնային հետազոտություն, որոնցից 155-ն անցել է խորացված հետազոտություն Աչքի շարժական հիվանդանոցում, տրամադրվել է 494 ակնոց: Շարժական հիվանդանոցում, որը կայանել է Ջերմուկում և Եղեգնաձորում, իրականացվել է 95 վիրահատություն և լազերային բուժում:
«Վայոց Ձորի բնակչությունն այդքան էլ մեծաքանակ չէ, սակայն ակնային ծառայությունների հասանելիությունը շարունակում է խնդիր մնալ մարզի համար: Ուստի և իրականացված աշխատանքները հատկապես անհրաժեշտ էին մարզում ակնային խնդիրներ ունեցող սոցիալապես անապահով մարդկանց համար: Ուրախ ենք, որ այս մարզում ևս Orange Հիմնադրամը մեր կողքին էր», – ասաց ՀԱՆ-ի հայաստանյան գրասենյակի տնօրեն Նունե Եղիազարյանը:
Կարդացեք նաև
Վայոց Ձորի աշխատանքների համար Orange Հիմնադրամը Հայկական Ակնաբուժության Կենտրոնին տրամադրել է 1,800,000 դրամ:
« Վայոց Ձորը չորրորդ մարզն է, ուր մենք այցելեցինք Հայկական Ակնաբուժության կենտրոնի հետ և կարողացանք մեծ թվով մարդկանց օգտակար լինել` վերադարձնել աչքի լույսը: Orange-ի` որպես հեռահաղորդակցության օպերատոր, առաքելությունն է հեշտացնել հաղորդակցումը մարդկանց միջև, այնպես որ մարդկային հաղորդակցության հետ կապված խնդիրները մեր հոգածության կենտրոնում են: Ուրախությամբ ենք հաստատում, որ մեր համագործակցությունը շարունակվելու է նաև այլ մարզերում, քանի որ կարողանում ենք իսկական փոփոխություն բերել մարդկանց կյանք», ասաց Orange Հիմնադրամի գլխավոր քարտուղար Նազարեթ Սեֆերյանը:
Հուլիս ամսին Orange Հիմնադրամի հետ համագործակցությամբ Հայկական Ակնաբուժական Նախագծի աշխատանքները շարունակվելու են արդեն Սյունիքի մարզում: Հուլիսի 3 – 7 ՀԱՆ-ի ակնաբուժական խմբերը կլինեն Սիսիանի շրջանում, հուլիսի 9 – 10` Մեղրիի շրջանում, հուլիսի 11 – 17` Կապանի շրջանում և հուլիսի 18 – 24` Գորիսի շրջանում: Աչքի շարժական հիվանդանոցը կկայանի Սիսիանում, Կապանում, և Գորիսում: Սյունիքի մարզի բոլոր բնակիչները` առանց բացառության, կարող են այցելել` ստուգելու տեսողությունը, իսկ սոցիալապես անապահով բնակիչները կկարողանան նաև անվճար վիրատություն կամ այլ բուժում ստանալ:
Մանրամասների համար Սյունիքի մարզի բնակիչները պետք է դիմեն իրենց բնակավայրի առողջության կենտրոն և հետևեն այնտեղ փակցված հայտարարություններին:
Սյունիքի մարզ այցելության ամբողջական ժամանակացույցի կարելի է ծանոթանալ` զանգահարելով 010559068, կամ այցելելով Հայկական Ակնաբուժության Կենտրոնի կայք.
https://eyecareproject-armenia.com/files/Syunik-12-Schedule-Arm-New.pdf
