«Ժառանգություն» խմբակցության պատգամավոր Ալեքսանդր Արզումանյանի համար կառավարության ծրագիրը կենաց է հիշեցնում: «48 էջանոց փաստաթղթում 46 էջ խոսոտումներ են, վերջին երկու էջում հստակ գրված «միջազգային ռիսկեր» վերտառության ներքո բացատրվում էր, թե ինչու նախորդ 46 էջը անհնար է լինելու իրականացնել: Այդ առումով սպասելիքներ չունեմ: Ծրագրի բոլոր նախադասությունները դրական եմ համարում, բարի ցանոկություններ էին, դրանք կենաց են հիշեցրել: Երբեւէ լսե՞լ եք վատ կենաց, մարդիկ կենաց ասելիս չեն անպատվում: Կա բարի մտադրությունների ծրագիր, եւ կա դրանք իրականացնելու մեխանիզմների ու գործիքների հերթականություն, այստեղ է տարբերությունը»,- այսօր «Պոստ սկրիպտում» ակումբում ասաց պարոն Արզումանյանը:
Նրան կառավարության ծրագրից շատ է դուր եկել ծնելիությունը խթանելու մասը. «Շատ է դուրս գալիս, բայց դրա համար պետք չէ կառավարություն ունենալ ու ծրագիր: Հայ ժողովուրդը 3000 տարի խթանել է ծնելիությունը, գիտի ոնց է արվում, դրա համար պետք է լավ պայմաններ լինեն, ու մարդը կարողանա առաջին 2-3 երեխաներին հասցնի հասուն տարիքի, եւ ոչ թե ասել` 4-ն ունեցիր` 1 միլիոն կստանաս, ապրել է պետք մինչեւ 4-ին հասնելը »:
Կառավարության նոր կազմի մասին էլ ասաց՝ կառավարության նոր կազմ չկա.«Սպասելիքներ չունեմ, որովհետեւ վերջին 4 տարում նույն կառավարությունը նույն խոստումները վերահաստատեց: Փորձը ցույց տվեց, որ այդ 4 տարիների ընթացքում որեւէ զարգացում չեղավ»:
Արփինե ՍԻՄՈՆՅԱՆ
Կարդացեք նաև
