Երբ ՀՀ կառավարությունը հողհատկացումը հաստատի, շինարարությունը կմեկնարկի
Դավիթաշեն վարչական շրջանում նախատեսվում է հիմնել հայ-ռուսական բարեկամությունը խորհրդանշող այգի, որը կկրի «Ժողովուրդների Բարեկամություն» անունը: Այգին կզբաղեցնի 2,3 հա տարածք եւ կունենա 4 գլխավոր դարպաս: Ըստ նախագծի, որի հեղինակը Կրասնոյարսկի շրջանում գործող «Ստիմեքս» շինարարական ընկերության տնօրեն Վլադիմիր Վոպիլովն է,
այգում վեր կխոյանա 50 մետր բարձրությամբ հուշակոթող: Կենտրոնական կոթողը կունենա զանգակատուն, որի 4 կողմերում Ռուսաստանը եւ Հայաստանը մարմնավորող երկու կնոջ եւ երկու տղամարդու բրոնզե արձաններ կտեղադրվեն:
Կարդացեք նաև
«Առավոտի» հետ զրույցում «Ստիմեքս» ընկերության հայաստանյան ներկայացուցիչ Սիմոն Ալավերդյանն ասաց, որ հայկական կողմի հավանությանն արժանացած այս ծրագիրն իրականացնելու համար գրեթե ամեն ինչ պատրաստ է: Այգու հիմնադրման վայրն ընտրվել է ՀՀ վարչապետ Տիգրան Սարգսյանի հանձնարարականով՝ նախկին քաղաքապետ Կարեն Կարապետյանն առաջարկել է տարածքը եւ հողհատկացում արել: Սակայն այժմ մնում է միայն, որպեսզի կառավարությունը հաստատի այն, որպեսզի սկսվի շինարարությունը: Իսկ գործի մեկնարկի համար էլ քաղաքային իշխանությունները պետք է «Ստիմեքս» ընկերության ղեկավար Վլադիմիր Վոպիլովին պաշտոնական հրավեր ուղարկեն:
Ս. Ալավերդյանի խոսքերով. «Այգու համար տարածքի ձեռք բերումը եւ ֆինանսավորումը կկատարի ռուսական կողմը: Սակայն այս գործում իրենց ներդրումը կունենան նաեւ Կրասնոյարսկում բնակվող հայազգի մեծահարուստները: Ողջ նախագծի արժեքը 35-40 միլիոն դոլար է»:
Հայ-ռուսական բարեկամությունը խորհրդանշող կառույցն իր տեսակով միակը կլինի ԱՊՀ երկրներում: Ի դեպ, համալիրի կառուցման գաղափարի գործում մասնակցություն ունի նաեւ Արցախի թեմի առաջնորդ Պարգեւ Սրբազանը, որն առաջարկել է կառույցը նվիրել 1813 թվականի Ռուսաստանի կայսրության եւ Պարսկաստանի միջեւ կնքված Գյուլիստանի պատմական պայմանագրի 200-ամյակին, ըստ որի՝ Արեւելյան Հայաստանի մի շարք շրջաններ՝ Արցախ, Զանգեզուր, Շիրակ, Լոռի, Տավուշ, անցան ռուսական կայսրության տիրապետության տակ:
Ս. Ալավերդյանի ներկայացմամբ, համալիրի կառուցմանը նաեւ հավանություն են տվել Կրասնոյարսկի իշխանությունները:
Սեփ. լր.
«Առավոտ» օրաթերթ
