«Մարդիկ` հանուն կենդանիների հանդեպ էթիկական վերաբերմունքի» (People for the Ethical Treatment of Animals, PETA) կազմակերպությունը հայտարարել է այս տարվա ամենասեքսուալ եւ հայտնի բուսակերների անունները: 2012 թվականին այդ պատիվը տրվել է 50-ամյա դերասան Վուդի Հարելսոնին եւ 35-ամյա դերասանուհի Ջեսիկա Չեսթեյնին:
Դեմի Մուրի հետ «Անպարկեշտ առաջարկ» ֆիլմում նկարահանվելուց հետո աշխարհով մեկ հայտնի դարձած դերասան Վուդի Հարելսոնը միս եւ կաթնամթերք չի ուտում արդեն 25 տարի: Դերասանի խոսքերով` նա կենդանական ծագման մթերքներից ստիպված էր հրաժարվել բժշկի ցուցումներով. կաթի եւ մսի չափից դուրս օգտագործման արդյունքում նրա մաշկի վրա կորյակային ցան էր առաջացել:
Իսկ Ջեսիկա Չեսթեյնը բուսակեր է դարձել 15 տարի առաջ: Սակայն վերջին հինգ տարում հետեւում է վեգանյան սննդակարգին, որը պահանջում է ընդհանրապես որեւէ կենդանական ծագման սնունդ չօգտագործել, անգամ` մեղր: Նա այս որոշումը բացատրում է նրանով, որ չի ուզում որեւէ ձեւով վնաս եւ ցավ պատճառել կենդանի էակներին եւ նրանց հանդեպ դաժան լինել:
PETA-ն հայտնում է, որ բուսակերության տարիների ընթացքում Հարելսոնը եւ Չեսթեյնը միասին օգնել են փրկել մոտավորապես 4,5 հազար կենդանի էակների կյանքը:
2012 թվականին ամենասեքսուալ բուսակերների կոչման հավակնորդներ էին նաեւ դերասանուհիներ Նատալի Պորտմանը, Լիզա Էդելշտեյնը, Օլիվիա Ուայլդը, երգչուհի Ֆիոնա Էփլը, դիզայներ Ստելլա ՄաքԿարթնին, ԱՄՆ նախկին նախագահ Բիլլ Քլինթոնը, երաժիշտ եւ դերասան Ջարեդ Լեթոն, բռնցքամարտիկ Մայք Թայսոնը, «Բիթլզի» նախկին անդամ Փոլ ՄաքԿարթնին եւ այլոք:
