Յուրաքանչյուր ֆուտբոլասեր երազում է գոնե մեկ անգամ ներկա գտնվել մարզական այնպիսի խոշոր տոնահանդեսի, ինչպիսին Լեհաստանում եւ Ուկրաինայում ընթացող ֆուտբոլի Եվրոպայի առաջնությունն է: Բայց բախտը ոչ բոլորին է ժպտում: Ավելին, երբեմն ճակատագիրը բարեհաճ է այնպիսիների հանդեպ, որոնք որուէ առնչություն չունեն սպորտի, տվյալ դեպքում՝ ֆուտբոլի հետ:
«Դոնբաս Արենայում»՝ Իսպանիա-Պորտուգալիա հանդիպման ժամանակ եղավ մի պահ, երբ մեր տրիբունայում նստած ֆուտբոլասերների ուշադրությունը մի քանի րոպեով շեղվեց խաղադաշտում ծավալվող իրադարձություններից: Դրա «մեղավորը» մի ղըրղըզ էր, որը նույնպես Դոնեցկ էր եկել Եվրոպայի առաջնության պաշտոնական հովանավոր «Կոկա-Կոլայի»՝ իրենց երկրում կազմակերպած ակցիայում շահելու շնորհիվ: Անմիջապես մեր ետեւի շարքում տեղ զբաղեցրած այս մարդը, որը հաստատ ֆուտբոլի հետ բացարձակապես կապ չուներ, օրվա ընթացքում հասցրել էր մի քանի բաժակ գցել ու… հանդիպումն սկսվելու պահից մինչեւ ավարտը, հարմար տեղավորված իր աթոռին, անուշ-անուշ քնեց՝ անհաղորդ «ֆուտբոլային խենթությանը»: Եվ ամենահետաքրքիրն այն էր, որ նրա քունը խանգարել ի վիճակի չէին ոչ կողքի մարդկանց գոռում-գոչյունները, ոչ էլ հարեւան սեկտորն ամբողջությամբ զբաղեցրած իսպանացի ֆուտբոլասերների թմբուկների դղրդյունն ու վուզուվելաների ականջ ծակող շչակները:
Աշոտ ՀԱԿՈԲՅԱՆ
