Aravot.am-ը ստացել է հաղորդագրություն «Սպայկա» ընկերությունից, որում ասվում է.«Ս.թ. հունիսի 19-ից Սպայկա ՍՊ ընկերությունը ՀՀ Արարատի և Արմավիրի մարզերում նախաձեռնել է աննախադեպ մասշտաբի ծիրանի մթերում, որի շնորհիվ հիմնովին լուծվել է տեղի համայնքների ծիրանի և կեռասի սպառման խնդիրը շուկայական բարձր գներով: Այս տարի բերքի հասունացումը տարբեր շրջաններում տեղի է ունեցել միաժամանակ և ընկերությունը ստիպված է եղել այս ընթացքում մթերել պլանավորված քանակներից ավելի շատ, որպեսզի ֆերմերները չկորցնեն բերքը կամ ստիպված չլինեն էժան գներով հանձնել վերամշակող գործարաններին: Հունիսի 29-ից Սպայկա ընկերությունը դադարեցնում է ծիրանի և կեռասի մթերումը պլանավորված ծավալներից ավել անհրաժեշտ շրջանառու միջոցների սղության պատճառով: Ներկայումս պետական ատյանների հետ բանակցություններ են ընթանում շրջանառու միջոցները հրատապ կերպով համալրելու վերաբերյալ: Ընկերությունը կարող է վերսկսել մթերումը հարցի դրական լուծման պարագայում:
Հարցի կարևորությունը պայմանավորված է ոչ միայն ծիրանի ու կեռասի մթերմամբ, այլև վտանգված են ընկերության կողմից 2012թ.-ի պլանավորված ողջ թարմ միրգ և բանջարեղենի մթերումները, քանի որ ՀՀ-ում սպասվում է դեղձի և խաղողի աննախադեպ բերք:
Հաշվի առնելով ֆերմերների կողմից հնչող տագնապները բերքի իրացման խնդրի հետ կապված` խնդրում ենք ֆերմերներին ըմբռնումով մոտենալ և ապավինել սեփական ուժերին գյուղմթերքի սպառումը իրականացնելու հարցում»:
