«Գյումրու շտապօգնություն կայան» ՓԲԸ-ի տնօրեն Ռոբերտ Թորոսյանի փաստելով` Գյումրիում շտապօգնության կանչերը տարեցտարի ավելանում են 2-5 տոկոսով:Սա շտապօգնության տնօրենը բացատրում է ոչ միայն հիվանդությունների թվի աճով, այլև տեխնիկական նորմուծություններով` հեռախոսացանցերի ընդլայնմամբ:
Նկատի ունենալով, որ Գյումրին դարձել է կրիմինալ քաղաք, այստեղ զենք կրելը կարծես թե մոդա է, վերջին շրջանում ով ում հետ հաշիվ ունի` ազատ կրակում է, դանկահարում է, մենք պարոն Թորոսյանից հետաքրրքվեցինք, թե իրենց մոտ գրանցված կանչերը ավելի շատ կրիմինալ դեպքերի հետևանքո՞վ են, թե՞ հիվանդացության: Պաշտոնյայի փաստելով, կանչերի 50%-ը կազմում են հիպերտոնիկ կրիզներն ու սրա հարուցած բարդությունները` ինֆարկտը, ինսուլտը, և քանի որ Շիրակի մարզը լեռնային շրջան է, բնակլիմայական պայմանները նպաստավոր չեն, այստեղ ավելացել են սրտանոթային հիվանդների թիվը: Ըստ բժշկի, Գյումրին օրական միջինը 2-4 ինֆարկտով հիվանդ է ունենում:
Կրիմինալ կանչերի հետ կապված էլ, տնօրենը խուսափողական պատասխան տվեց. «Ճիշտն ասած` մեր մարզում միշտ էլ էդքան բարձր չի եղել, և մենք ակտիվ էլ աշխատում ենք և ներքին գործերի և հրշեջների, և մյուս ուժային կառույցների հետ , շատ լավ համագործակցում ենք արտակարգ իրավիճակների մարզային կառույցի հետ»:
Ի դեպ, Գյումրու շտապօգնության կայանի 65-ամյա բժիշկ Աշոտ Գրիգորյանի սպանությունից հետո մի կարևոր տեխնիկական նորամուծություն են մտցրել, այժմ ձայնագրվում են բոլոր կանչերը, խոսակցությունները, ավելին` տեսաձայնագրման սարքերի միջոցով ֆիքսվում է թե մեքենան որ ժամին դուրս եկավ, ուր գնաց, որ փողոցներով երթևեկեց ու երբ կանգնեց հիվանդի դռան առջև , կարճ ալիքային ռադիոկապի միջոցով էլ կապ է հաստատվում մարզի բոլոր տեղանքների միջև: Շտապօգնության տնօրենի խոսքերով` իրենց աշխատանքին հնարավոր է հետևել նաև ինտերնետով:
Նունե ԱՐԵՎՇԱՏՅԱՆ
