ՀԱԿ առաջնորդ Լեւոն Տեր-Պետրոսյանը վերջին հանրահավաքի իր ելույթում նշել էր, որ յուրաքանչյուր ոք պետք է ընդամենը իրեն մեկ հարց տա` «կոալիցիոն կառավարությանը մաս կազմելուց «Բարգավաճ Հայաստանի» հրաժարումը ուժեղացրե՞ց, թե՞ թուլացրեց Սերժ Սարգսյանին կամ, նույնն է թե, ավազակապետությանը։ Վստահ եմ, որ չնախապաշարված ցանկացած մարդ կպատասխանի՝ պարզ չէ՞, որ թուլացրեց։ Էլ մեր ուզածն ի՞նչ էր, եւ ինչո՞վ են զբաղված խառնակիչները»:
Այս առնչությամբ Aravot.am-ը ՀԱԿ պատգամավոր Լյուդմիլա Սարգսյանից հետաքրքրվեց` իսկ այս տարիների ընթացքում Կոնգրեսը չի՞ թուլացել` ինչին նա պատասխանեց. «Համենայնդեպս, եթե դուք կարծում եք, որ ՀԱԿ-ը թուլացել է, ապա ոչ դրա արդյունքում, բնական է, ընդդիմությունն այդքան ռեսուրս չունի, հնարավորություն չունի մշտապես մարդկանց քանակն ակտիվ պահելու: Դա բնական է, բայց ես չեմ համարում, որ մենք թուլացել ենք: Երկրում շատ հնարավոր է, որ իրավիճակ փոխվի, եւ դրա արդյունքում մենք կունենանք նորից 2007-ի նախագահական նախընտրական շրջանի ակտիվությունը: Եվ կտեսնեք, որ ընդդիմությունը շարունակում է ուժեղ մնալ, եւ ժողովուրդն էլ չի կարող երես թեքել ընդդիմությունից, քանի որ դժգոհությունը շատ մեծ է իշխանությունից»:
Մեր դիտարկմանը, որ խոսքը միայն շարքային քաղաքացիների մասին չէ, խոսքը ՀԱԿ-ին սատարող առաջնային ակտիվ դեմքերի մասին է, որոնք կամ անջատվել են Կոնգրեսից, կամ պասիվ վիճակում են գտնվում` Լյուդմիլա Սարգսյանը պատասխանեց. «Նաեւ քաղաքական ուժերը ներկայացնող անձերը նույնպես մարդիկ են, որ ժամանակի ընթացքում որոշակի տրամադրությունների փոփոխություններ է լինում, հոգնածություններ է լինում: Ես մասնակցում եմ քաղխորհրդի նիստերին եւ տեսնում եմ, որ բոլոր այն մարդիկ, ովքեր մեզ հետ շուրջ 5 տարի պայքարի մեջ են, նույն տրամադրվածությամբ շարունակում են պայքարել: Մենք ժողովրդավար կառույց ենք եւ բնականաբար, երբեմն լինում են կարծիքների տարբերություն, որը միանգամայն ողջունելի է»:
Կարդացեք նաև
Մեր հարցին` Դուք մտածում եք, որ հետագայում հնարավոր է նո՞ր ուժեր միանան ՀԱկ-ին` Լյուդմիլա Սարգսյանը պատասխանեց` «Իհարկե»:
Հռիփսիմե ՋԵԲԵՋՅԱՆ
