Aravot.am-ն այսօր Հայաստանի պետական ագրարային համալսարանում էր. դիմորդները բանավոր քննություն էին հանձնում ռուսաց լեզվից: Այն շարունակվելու է եւս երկու օր:
Ռուսաց լեզվի բանավոր քննության հանձնաժողովի նախագահ Լիլի Բալասանյանն ասաց, որ այսօրվա քննական օրը դեռ ոչնչով չի ուրախացրել իրենց, սակայն դեռ սպասում են լավագույն դիմորդին. «Միավորները շատ ցածր են, առավելագույնը` դեռ 15-ն է: Հույսով եմ, որ այս շրջանավարտների մեջ կգտնվեն երեխաներ, ովքեր կունենան դրական վերաբերմունք ռուսաց լեզվի նկատմամբ: Կա բավականին լուրջ լեզվական խնդիր. երեխան չի ճանաչում հոլովները: Կարծում եմ՝ նրանք ընդունվելով բուհ, կձգտեն գերազանց տիրապետել լեզվին»:
Այս տարի հարցաթերթիկները մի փոքր դժվարեցվել են: Դրանցում ընդգրկված երկու հարց գրականությունից է, մեկը` քերականությունից: Ըստ Բալասանյանի, անցյալում նկատելի է եղել` երեխաները քննությանը ներկայացել են անգիր արած. «Դրա համար էլ որոշեցինք դժվարեցնել հարցերը»:
Դիմորդ Ելենա Բուռնությանը ցանկանում է ընդունվել ԵՊՀ-ի բանասիրական ֆակուլտետ: Մինչ այժմ քննությունները հանձնել է հաջող եւ հուսով է` ռուսաց լեզվի բանավոր քննությունը նույնպես լավ կհանձնի:
«Պատրաստվել եմ իմ ուժերով, ոչ-մի կրկնուսույցի չեմ դիմել»,- ասում է Ելենան:
Իսկ դիմորդներից մեկը, ով ստացել էր 14 միավոր, դժգոհ էր իր գնահատականից: Նա արտասվում էր հենց քննասենյակում եւ փորձում էր համոզել հանձնաժողովի անդամներին, որպեսզի հնարավորություն տրվի բարձրացնել իր միավորը:
Aravot.am-ը փորձեց զրուցել նրա հետ, սակայն աղջկա լարվածության պատճառով` չստացվեց: Լիլի Բալասանյանի հավաստիացմամբ, աղջիկը շատ վատ է խոսել ռուսերեն ու ցանկացել է համալսարան ընդունվել անվճար. «Գրավորից ստացել է 17 բալ: Դա խոսում է այն մասին, որ երեխան բավականին լուրջ է պատրաստվել եւ ձգտում ունի: Ես փորձեցի նրան հանգստացնել, որ ընթացքում կսովորի եւ կանցնի անվճար, սակայն համոզված եմ, որ անվճարի համար պայքարող երեխաները պետք է քննության մտնեն մաքսիմալ գիտելիքներով»:
Արամ ԱՐԱՐԱՏՅԱՆ
