Այսօր Aravot.am հետ զրույցում Անիի տարածաշրջանի Քարաբերդ գյուղի բնակիչները հայտարարեցին, թե իրենց գյուղի դպրոցականները համատարած զրկվել են կույրաղիքներից: Նրանց ասելով` լեռնային այս գյուղում մշտապես ձմեռ է, իսկ դպրոցում 10 տարուց ավելի է` ջեռուցում չկա: Թեև գազը կրթօջախից 10 մետր հեռավորության վրա է գտնվում, բայց ոչ մեկը չի ստանձնում այն դպրոց հասցնելու գործը, և գյուղի երեխաները ստիպված են տաքանալ հին մեթոդով` «էլեկտրական պլիտաներով»: «Բա ամոթ չէ՞, ո՞վ է տեսել, որ էս դարում երեխաները մրսեն ու բոլորի կույրաղիքները հերթով հանեն, մեկինը չէ, երկուսինը չէ, չգիտեմ, որ մեկինը ասեմ, ամեն օր մեկի կույրաղիքը վիրահատում են: Մանկավարժներն էլ իրենց հերթին անընդհատ դասի չեն գալիս, մեղադրել չի լինում, էդ խեղճերը մրսում ու հիվանդանում են, բա սրանից լուրջ խնդի՞ր կա էս երկրում, հիվանդոտ սերունդ եք մեծացնում»,- խմբովի բողոքեցին գյուղացիները:
Մեզ մի պահ թվաց, թե այս տեղեկությունը չափազանցված է, հետևաբար և մոտեցանք գյուղի դպրոցի տնօրենին` Վահրամ Հովհաննիսյանին, ճշտելու, թե որքանո՞վ է հավաստի գյուղացիների ասածը: Դպրոցը տնօրենը ևս հաստատեց նրանց խոսքերը` նշելով, որ չնայած այդպիսի ծանր պայմաններին` իրենց դպրոցի շրջանավարտները Երևանի պետական համալսարանից պակաս բուհ չեն սովորում, նույնիսկ Սորբոն սովորող ուսանողուհու ունեն: «Գյուղացիները ձեզ մի փոքր սիրունացված են ներկայացրել, բայց կույրաղիքների մասին ասածը իրականությանը իրոք համապատասխանում է, երկու տարի է` գյուղը գազիֆիկացրել են , բայց դեռ դպրոց չի հասել: Մենք հին կաթսայատուն ունենք, մնում է կաթսայատունը վերանորոգեն, նախահաշիվը մանարամասնորեն ներկայացրել ենք, մոտավորապես 25 միլիոն դրամի աշխատանք է, խոստացել են անպայման այս տարվա մեջ իրականացնել սոցներդրումների հիմնադրամի միջոցներով: Երկու հերթով ենք աշխատանքները կազմակերպում, որպեսզի գոնե ունենաք մինիմալ ջեռուցում, էն տաք օրերին դպրոցում ջերմաստիճանը լավագույն դեպքում 15-20 աստիճան է», -ասաց Վահրամ Հովհաննիսյանը:
Նրա պատմելով, կաթսայատան վերանորոգման հարցով իրենց մոտ բարձրաստիճան պաշտոնյաներ են եկել, իրենք էլ դպրոցի ջեռուցման խնդիրը ներկայացնելիս շեշտել են, որ գյուղը 2000 մետր բարձրության վրա է, ի պատասխան սրան, պաշտոնյա-հյուրերը կատակել են` ասելով. «Եթե էդքան Աստծուն մոտ եք, ուրեմն թող Աստված ձեզ օգնական լինի»: «Իհարկե Աստված մեզ օգնական է, բայց լավ կլինի անկեղծ, անմիջական օգնականներ ունենանք»,- ակնարկում է դպրոցի տնօրենը:
Նունե ԱՐԵՎՇԱՏՅԱՆ
Կարդացեք նաև
