«Ժառանգություն» կուսակցության վարչության փոխնախագահ Արմեն Մարտիրոսյանը, ԲՀԿ-ի քաղաքական պահվածքը վերլուծելով, օրեր առաջ հայտարարեց, թե ԲՀԿ-ն դեմ է կոնկրետ վարչապետի անձին և հաստատ ԲՀԿ-ում կարող են մտածած լինել, որ իրենք կարող են հավակնել վարչապետի պաշտոնին:
Ուստի Aravot.am-ը ՀՀԿ-ական պատգամավոր Խոսրով Հարությունյանի հետ զրույցում հետաքրքրվեց՝ պատգամավորը համաձա°յն է «Ժառանգության» ներկայացուցչի հետ: Պարոն Հարությունյանը պատասխանեց. «ԲՀԿ-ն նախընտրական ամբողջ մրցարշավի ընթացքում իր քննադատության թիվ մեկ թիրախը համարում էր վարչապետին և կառավարությանը: Նա չի էլ թաքցրել այդ դժգոհությունը: Իհարկե, այս հայտարարությունները մի քիչ խոցելի են այն առումով, որ ԲՀԿ-ն նման դժգոհություն արտահայտելու բազում հնարավորություններ ուներ, երբ կոալիցիայի մեջ էր: Բայց եթե հաշվի առնենք, որ կոալիցիան կազմվեց մարտիմեկյան իրադարձություններից հետո, ապա կարելի է հասկանալ, որ ԲՀԿ-ն այն ժամանակ քաղաքական իշխանությանը հավելյալ ամրության պաշար հաղորդելու առաքելություն ուներ, որ նախագահին հաջողեր մարտի մեկից հետո ստեղծված իրավիճակից հասարակությունը քայլ- քայլ, զգուշորեն տեղափոխել բնական զարգացումներ: Այդ ժամանակ ԲՀԿ-ն գիտակցում էր իր մասնակցությունը ավելի կարևոր առաքելությանը և կարող էր կառավարության արժանի, բայց անհարկի քննադատությունից զերծ մնալ»:
Վերլուծելով իրավիճակը ընտրությունների շրջանում ՝ Խ. Հարությունյանը նշեց. «ԲՀԿ-ն չէր կարող այդ շրջանում չհայտարարել կառավարության նկատմամբ իր ունեցած դժգոհությունը: Նա այդ իրավունքն ուներ: Եվ ընտրությունների արդյունքում ձևավորվեցին երկու քաղաքական լիդերներ, ու ողջամտությունը եւ էթիկան ենթադրում էր, որ ՀՀԿ ղեկավարը, ՀՀ նախագահը պետք է առաջարկի ԲՀԿ-ին՝ արդյոք կցանկանա՞ համագործակցությունը շարունակել: Անբնական կլիներ, որ նախկին կոալիցիոն գործընկերոջը նման առաջարկ չլիներ: Եվ այստեղ կարող էր ԲՀԿ-ն ասել, այո կհամագործակցենք, եթե լինի սա… ԲՀԿ-ն չէր կարող մտնել կոալիցիա, որը կարող էր ակնհայտորեն պաշտպանել վարչապետին և կառավարությանը»:
Մեր հարցին` հնարավո°ր է ԲՀԿ-ն գայթակղվի Խ. Հարությունյանի ձևակերպմամբ «ՀԱԿ-ի սիրաշահումներին» այն դեպքում, երբ տեսնում է, որ երկրի կարևորագույն պաշտոնները, միևնույն է, ՀՀԿ-ի ձեռքին են: Այս կապակցությամբ Խ. Հարությունյանն ասաց. «ԲՀԿ-ն, որ չմտավ կոալիցիա, քաջ գիտակցում էր, որ ինքը այլևս չի կարող չլինել կոալիցիայի մեջ, բայց ստանձնել պատասխանատվություն: Նա շատ իմաստավոր քայլ է արել: Բայց նա չի կարող գայթակղված լինել, թե տեսեք մի քանի պաշտոն ունեի, դա էլ չմնաց: Չեմ կարծում, որ ԲՀԿ-ին այդպիսի մոտեցումներն են առաջնորդում: Կգայթակղվի՞ ԲՀԿ-ն ՀԱԿ-ի սիրաշահումներով` թույլ տվեք կասկածեմ: Այնքան պարզ է, որ ՀԱԿ-ի ղեկավարությունը իր քաղաքական նպատակների համար փորձում է օգտագործել ԲՀԿ-ի կապիտալը, իսկ դա անիրականանալի է»:
Կարդացեք նաև
Տաթև ՀԱՐՈՒԹՅՈՒՆՅԱՆ
