Հայտնի նկարիչ, պոետ և գեղարվեստական լուսանկարի մեծ վարպետ Սամվել Սևադան այսօր Թմրանյութերի չարաշահման և ապօրինի շրջանառության դեմ պայքարի միջազգային օրվան նվիրված աշխատանքների ցուցահանդես-վաճառքի հեղինակն էր: ՄԱԿ-ի աշխատակիցներին, պետական պաշտոնյաներին, արվեստասերներին ու քաղաքացիական հասարակության ներկայացուցիչներին Սամվել Սեւադան ներկայացրեց իր արվեստի նմուշները:
Սեւադայի ավելի քան 400 աշխատանքներ գնվել եւ այժմ գտնվում են ԱՄՆ-ի եւ այլ երկրների թանգարաններում, ցուցասրահներում եւ անհատական հավաքածուներում:
«Ներկայացնում եմ իմ վերացական արվեստի 32 նմուշները, որոնք հիմնականում յուղաներկով են: Ցուցահանդեսի նպատակն է աջակցել առողջ ապրելակերպի, մարդու իրավունքների եւ կայուն զարգացման գաղափարների տարածմանը: Թմրանյութերի դեմ պայքարի օրվան կողմ եմ եւ հավաքված գումարի մի մասը տրամադրելու եմ այս շարժմանը»,-ասաց լուսանկարիչը:
Կարդացեք նաև
Ըստ նկարչի, ի տարբերություն մյուս երկրների, այսօր Հայաստանում քչերն են օգտագործում թմրանյութ եւ ծխախոտ, նա նույնպես կտրականապես դեմ է՝ անծանոթներին զգուշացնում, իսկ մտերիմներին արգելում է իր մոտ ծխել:
ՄԱԿ-ի հանրային տեղեկատվության վարչության ներկայացուցիչ Մարիա Դոցենկոն ասաց. «ՄԱԿ-ի դռները ըստ ավանդույթի, բաց են հայ արվեստագետների առջեւ, ովքեր օգտագործում են իրենց տաղանդը՝ խրախուսելու ՄԱԿ-ի արժեքներին ուղղված խաղաղության ապահովմանը, կայուն զարգացմանը, առողջ ապրելակերպին ու շրջակա միջավայրի պահպանությանը, մարդու իրավունքների նկատմամբ հարգանքին ու հասնելու հազարամյակի զարգացման նպատակներին»:
Անժելա ՇԱՀՈՒՄՅԱՆ
