«Լսելով առաջին նախագահի երեկվա հանրահավաքային ելույթը` ես եւս մեկ անգամ զգացի, որ քաղաքականության մեջ զարմանալու առիթներ միշտ լինում են»,- ՀՀԿ մամուլի խոսնակ, ԱԺ փոխխոսնակ Էդուարդ Շարմազանովն Aravot.am-ի հետ զրույցում այսպես մեկնաբանեց Լեւոն Տեր-Պետրոսյանի ելույթը` ՀԱԿ հանրահավաքում:
Ըստ Շարմազանովի` «Առաջին նախագահը եւ ՀԱԿ առաջնորդը, փոխանակ կոնկրետ ներկայացներ Լեռնային Ղարաբաղի բանակցությունների առաջընթացին խոչընդոտող պատճառը եւ այդ պատճառը հանդիսացող Ադրբեջանը, ինքը գերադասեց համանախագահ երկրների նախագահների վերջին հայտարարության վերլուծություն կամ վերծանում կազմակերպել, այն էլ` սուբյեկտիվ: Ես կարծում էի, որ առաջին նախագահը կտար ոչ թե սուբյեկտիվ վերծանում ու սուբյեկտիվ գնահատական, այլեւ հստակ խոսք կասեր, թե Ղարաբաղյան հիմնահարցը եւ բանակցությունները ինչու են մտնում փակուղի կամ ինչու զարգացումներ չեն լինում: Ես սպասում էի, որ նա պետք է ասեր, որ Ադրբեջանը միլիտարիստական հռետորաբանություն է բանեցնում, որ Արբեջանը տեղական մակարդակով իրականացնում է դիվերսիա եւ սպանում է հայ զինվորներին` սահմանում, Ադրբեջանը հայատյացություն եւ ֆաշիզմ է քարոզում, ինչը հստակ երեւոմ է թե’ նրանց գործողություններից, թե նրանց ղեկավարների հայտարարություններից: Սակայն, ի զարմանս ինձ, առաջին նախագահը ոչ միայն դա չարեց, այլ նույնիսկ հավասարության նշան է դնում Հայաստանի եւ Ադրբեջանի վարքագծի ու գործողությունների միջեւ, որը, կարծում եմ, արդարացված չէ: Մենք միջազգային կառույցներից միշտ սպասում ենք, որպեսզի նրանք տարբեր հայտարարություններ ընդունելու ժամանակ հստակ հասցեատեր նշեն: Մենք միշտ ասում ենք, որ քանի դեռ հստակ չեն նշում խոչընդոտին, այսինքն` նրան, ով որ քարոզում է պատերազմ ու հավասարության նշան են դնում Հայաստանի եւ Ադրբեջանի միջեւ, ապա վտանգ կա, որ բանակցությունները չեն զարգանա: Հիմա նույն բանն անում է մեր երկրի առաջին նախագահը, որը, կարծում եմ, արդարացված չէ»:
Ինչ վերաբվերում է ներքաղաքական իրավիճակի վերլուծություններին, դա Էդուարդ Շարմազանովին հիշեցրել է ձոն եւ փառաբանություն` ուղղված «Բարգավաճ Հայաստանին» եւ մամուլի տեսության լոկ սուբյեկտիվ գնահատական:
Կարդացեք նաև
Հռիփսիմե ՋԵԲԵՋՅԱՆ
