«Հարսնաքարում» մեր հասարակության մեջ ընդունված փոխհարաբերությունների նորմերը կիրառվեցին, այսինքն՝ այսօր ես տեր եմ, հետեւաբար՝ կարող եմ այսպես վարվել»,- «Հարսնաքարի» դեպքի վերաբերյալ այս գնահատականը տվեց ազգագրագետ Հրանուշ Խառատյանը:
Նրա ձեւակերպմամբ՝ սխալ է, երբ ՀՀԿ պատգամավոր Ռուբեն Հայրապետյանի՝ հասարակության եւ իշխանության կողմից խորը հարգանքի արժանացած մարդու «Հարսնաքարում», տեղի են ունենում երեւույթներ, ինչի հետ կապված մեկ այլ ՀՀԿ պատգամավոր Շուշան Պետրոսյանը հայտարարում է, թե Ռուբեն Հայրապետյանը պետք է պատժի այդ տղաներին. «Բայց, Ռուբեն Հայրապետյանն ինչ կապ ունի պատժելու հետ, ինչո՞ւ պետք է նա պատժի բացահայտ քրեական հանցագործություն կատարածին: Սա նրանից է, որ մեր ուղեղում նստած է, որ Ռուբեն Հայրապետյաններն են որոշում պատժել, ծեծել, փրկել, թե՞ չփրկել…»:
Խառատյանը նաեւ նշեց՝ մամուլը շատ լավ արտացոլում է այս դեպքի հետ կապված իրականությունը, այսինքն՝ ակնհայտ է, որ ամեն ինչ կեղծ է լինելու. «Դա ոչ միայն իմ, այլեւ հասարակության համոզմունքն է: Նորմալ դատական պրոցես չի լինելու, հավանաբար մեկ տարի պայմանական ազատազրկման կենթարկեն մեղավորին ու վերջ»:
Եվա ՀԱԿՈԲՅԱՆ
