ԽԱՉԱՏՈՒՐ ՔՈՔՈԲԵԼՅԱՆ
«Ազատ դեմոկրատներ» կուսակցության նախագահ, «Ժառանգություն» խմբակցության անդամ
-Ընդդիմությունը ոչ միայն պետք է կարողանա միասնական թեկնածու առաջադրել, այլեւ պարտավոր է քաղաքական ճշգրիտ հաշվարկներ կատարել եւ ընդհանուր հայտարարի գալ: Իմ խորին համոզմամբ, ակնհայտ է, որ հակառակ դեպքում գործող նախագահը կարող է ծանրակշիռ մրցակից չունենալ եւ հեշտ առավելություն ստանալ:
Միաժամանակ հասկանալի է, որ մեր ընդդիմադիր դաշտը բազմաշերտ է, աշխարհաքաղաքական տարբեր ուղղվածություններ ունի, անգամ ներքին խնդիրները լուծելու հակադիր մոտեցումներ է առաջադրում: Ուստի ընդհանուր տեսակետի գալն ու միասնական թեկնածու առաջադրելը բարդ է լինելու:
Կարծում եմ, ընդդիմությունը նախ պետք է կարողանա ձեւակերպել Հայաստանի առաջընթացն ապահովող կարեւորագույն ու առաջնահերթ լուծում պահանջող խնդիրները՝ առանց հաշվի առնելու գաղափարական տարաձայնությունները:
Ընդդիմությունը պետք է իր մեջ ուժ գտնի եւ իրեն կարողանա առաջադրել որպես իշխանություններին իրական այլընտրանք: Միասնական նախագահի թեկնածու ունենալը միշտ է դժվար:
Չեմ բացառում նաեւ, որ ընդդիմության մի քանի թեկնածուների դեպքում հենց ժողովուրդը կենտրոնանա այն թեկնածուի շուրջ, ով կարող է իրական այլընտրանք լինել իշխանության թեկնածուին: Նման թեկնածուներ, բնականաբար, կան, սակայն նրանց մասին խոսել, երբ դեռ իրենք իրենց որոշումը չեն հրապարակել, ճիշտ չի լինի:
ՌՈՒԲԵՆ ՀԱԿՈԲՅԱՆ
«Ժառանգություն» խմբակցության ղեկավար
-Կարծում եմ, ընդդիմությունը ոչ թե ընդդեմ՝ իշխանության կամ մեկ այլ թեկնածուի դեմ ուժեղ մրցակից առաջադրելու համար պետք է միասնական թեկնածու ունենա, այլ ընդհանրապես միավորված ընտրությունների գնալն ու միասնական թեկնածու ունենալը ճիշտ է:
Միաժամանակ չեմ կարծում, թե ընդդիմադիր դաշտում կարող է լինել մեկ նախագահի թեկնածու, որի շուրջ կհամախմբվեն բոլոր ընդդիմադիր կուսակցությունները: Ամենատարբեր օբյեկտիվ ու սուբյեկտիվ պատճառներով դա պակաս հնարավոր է:
Սուբյեկտիվ պատճառներից ամենատեսանելին այն է, որ կան մարդկային գործոններ: Օբյեկտիվ պատճառներից անենակարեւորն այն է, որ ընդդիմադիր դաշտում գործող կուսակցությունները ամենատարբեր գաղափարախոսությունների կրողներ են, եւ այս ուժերի միավորումը կարող է ինքնանպատակ դիտվել: Առավել հավանական եմ համարում, որ լինեն թեկնածուներ, որոնց շուրջ կհամախմբվեն գաղափարակից կուսակցությունները եւ հասարակական կազմակերպություններ:
Այս տարբերակը ոչ միայն ավելի իրական է, այլեւ նպաստավոր քաղաքական դաշտի առաջընթացի համար: Մենք այսօր այս ուղղությամբ աշխատում ենք: Արդյունքներն ընթացքը ցույց կտա: Քաղաքական գործընթացների անորոշությունները եթե հաշվի առնելու լինենք, ապա այսօր շատ վաղ է խոսել հավանական թեկնածուների մասին: Միաժամանակ հավատացած եմ, որ մենք անպայման կունենանք մեր թեկնածուն:
Կարդացեք նաև
Գեւորգ ՀԱՐՈՒԹՅՈՒՆՅԱՆ
«Հայոց աշխարհ»
