Եվրադատարանի վճռի համաձայն, Վարդան Մալխասյանը 2006-ի դեկտեմբերի 9-ից 2007-ի օգոստոսը կալանքի տակ պահվել է Մարդու իրավունքների Եվրոպական կոնվենցիայի խախտմամբ, եւ որպես փոխհատուցում՝ ՀՀ կառավարությունը նախկին քաղբանտարկյալին պետք է վճարի 4 հազար 500 եվրո։ Վերջինս 2006-ի դեկտեմբերի 9-ին ձերբակալվեց ՀՀ քրեական օրենսգրքի 301-րդ հոդվածի (ՀՀ սահմանադրական կարգը բռնությամբ փոխելուն ուղղված հրապարակային կոչեր) մեղադրանքով։ Որպես սահմանադրական կարգը բռնությամբ փոխելու կոչ ներկայացնում էին Վարդան Մալխասյանի՝ իշխանություններին առնչվող ելույթները։ Չնայած առաջադրված մեղադրանքն անհեթեթ եւ անհիմն էր, բայց միեւնույն է՝ Մալխասյանը 2007-ի օգոստոսի 6-ին դատապարտվեց երկու տարի ազատազրկման եւ ազատ արձակվեց 2008-ի դեկտեմբերի 9-ին (քրեական օրենսգրքի 301-րդ հոդվածը հետագայում փոխվեց): Նույն քրեական գործի շրջանակներում մեկուկես տարվա ազատազրկման դատապարտվեց Շուշիի հատուկ գումարտակի նախկին հրամանատար, ազատամարտիկ Ժիրայր Սեֆիլյանը։ Վերջինս դատապարտվեց ՀՀ քրեական օրենսգրքի 235-րդ հոդվածի 1-ին մասով (ապօրինի զենք-զինամթերք պահելը): Սեֆիլյանի մեղադրանքի հիմքում դրված էր նրան պաշտոնապես նվիրված ատրճանակը, որը, իբր, նա ապօրինի էր պահել։
Փաստաբան Վահե Գրիգորյանը, որը այս գործով եղել է Ժիրայր Սեֆիլյանի պաշտպանը, մեզ հետ զրույցում ասաց, որ եվրադատարանն իր այս վճռով անդրադարձել է միայն Մալխասյանի կալանքի խնդրին։ Իսկ նրան եւ Սեֆիլյանին ազատազրկման դատապարտելու խնդիրը Եվրադատարանը դեռեւս քննարկում է. ներկայացված դիմումների վերաբերյալ վճիռները ԵԴ-ն նոր պետք է կայացնի։
Վարդան Մալխասյանը մեզ հետ զրույցում ասաց, որ Եվրադատարանի վճիռն իր համար կանխատեսելի էր, պարզապես ինքը կարծում էր, որ փոխհատուցման հարցում վճիռն ավելի խիստ կլինի։ Մալխասյանը Եվրադատարան ներկայացրած իր դիմումով, որպես փոխհատուցում, պահանջել էր 110 հազար եվրո։ «Իհարկե, այստեղ կարեւորը գումարի չափը չէ, այլ այն փաստը, որ Եվրադատարանն իր վճռով հաստատեց, որ իմ նկատմամբ կիրառված խափանման միջոցը՝ կալանքը, սխալ է եղել»,- ասաց Մալխասյանը։ Նրա կարծիքով՝ Եվրադատարանն իր այս վճռով հերթական անգամ հաստատեց, որ Հայաստանում արդարադատություն գոյություն չունի։ «Հայաստանը ոչ թե իրավական պետություն է, այլ չարիքի, խաբկանքի, ստորության տիրապետություն է։ Դատավորները մեզ մոտ արդարադատություն չեն իրականացնում»,- ասաց Մալխասյանը։
Վահագն ՀՈՎԱԿԻՄՅԱՆ
Կարդացեք նաև
«Հայկական ժամանակ»
