Ցուցմունք է տալիս Հարութիկ Կիրակոսյանը:
Հունիսի 26-ին Իջեւանում կայացավ Արտակ Նազարյանի մահվան գործով դատական հերթական նիստը: Ցուցմունքներ տվեցին ամբաստանյալներ` ժամկետային զինծառայողներ Հարութիկ Կիրակոսյանը եւ Ադիբեկ Հովհաննիսյանը:
Հ. Կիրակոսյանը ավարտել է զինվորական ծառայությունը եւ ներկայումս ազատության մեջ է: Երկու ամբաստանյալներն էլ հայտարարեցին, որ պատասխանելու են միայն իրենց պաշտպան, փաստաբան Ալվարդ Մնացականյանի, տուժողի իրավահաջորդ Ծովինար Նազարյանի եւ վերջինիս ներկայացուցիչ, փաստաբան Մուշեղ Շուշանյանի հարցերին: Սակայն Հ. Կիրակոսյանը պատասխանեց դատավարության բոլոր մասնակիցների հարցերին, իսկ Ա. Հովհաննիսյանը՝ ամբաստանյալ Հակոբ Մանուկյանի պաշտպան Հրանտ Գեւորգյանի եւ մեղադրող Հարություն Հարությունյանը հարցերի մի մասին: Ամբաստանյալներն ասացին, որ Բերդ քաղաքում, ռազմական ոստիկանությունում իրենց 9 օր ծեծել, շանտաժի են ենթարկել:
– Տարան մենախցերը, հետո բարձացրին վերեւ, մոտ 9 ժամ հարցաքննեցին, անկյունում անընդհատ կանգնած էինք, ծեծվելով, տարբեր տարիք եւ կոչում ունեցող մարդիկ էին մտնում-ելնում, հարցնում էին՝ ո՞վ է սպանել: Ինձ ասում էին՝ մենք գիտենք, որ դու ես սպանել, գրի, որ դու ես սպանել, դե ասա, թե ո՞վ է սպանել: Անուններ էին նշում, սկզբում համարյա բոլորի անուններն էլ նշում էին: Չէի գրում,ասում էի՝ ո՞ւմ անունը տամ, որ ես նման բան չեմ տեսել: Բայց մարդիկ եղան, որ գրեցին մեր անունները, որ իբր մենք ենք դրդել ինքնասպանության, չդիմացան երեւի ծեծին,- դատարանում հայտարարեց Հարութիկ Կիրակոսյանը:
Նա ասաց, որ ծեծի հետեւանքով իր ոտնաթաթը ուռել էր, պատերից բռնելով էր քայլում, ռազմական հոսպիտալի պետը եւ նրա տեղակալը եկել-տեսել են, իրեն տեղափոխել են հոսպիտալ, սակայն այնտեղ չեն բուժել, քանզի այդ պահին իրեն արդեն ներգրավվել են որպես մեղադրյալ: Երեք օր անց 3 զինվորներին, որոնց հետագայում մեղադրանք են առաջադրել, առանձնացրել են, միասին պահել ամենամութ, ամենախոնավ խցում: Ամբաստանյալներն ասացին, որ զինվորների եւ Արտակ Նազարյանի փոխհարաբերությունները լավ են եղել, Նազարյանը իր ենթակա զինվորների հանդեպ հոգատար էր: Երկու ամբաստանյալներն էլ իրենց մեղավոր չճանաչեցին:
Կարդացեք նաև
![««Նախկին» անարդար համակարգին հաջորդող «աննախադեպ» համակարգը մնաց նույնքան անարդար. ԶՈՒ Լեյտենանտ Արտակ Նազարյանի մահվան [չ]բացահայտումը՝ 14 տարի անց»](https://www.aravot.am/wp-content/uploads/2024/01/Artak-Nazaryan-437x275.jpg "««Նախկին» անարդար համակարգին հաջորդող «աննախադեպ» համակարգը մնաց նույնքան անարդար. ԶՈՒ Լեյտենանտ Արտակ Նազարյանի մահվան [չ]բացահայտումը՝ 14 տարի անց»")
Հարութիկ Կիրակոսյանը ժխտեց, թե ինքն Արտակ Նազարյանի հետ կռվի է բռնվել, բռնել նրա վզից, փորձել խեղդել: Նա ասաց, որ չէր կարող սպայի հետ կռվել, բացի այդ Արտակ Նազարյանը ֆիզիկապես ուժեղ էր, պարապում էր ծանրաձողով, սպորտային կազմվածք ուներ: Ադիբեկ Հովհաննիսյանն էլ ժխտեց, որ մի առիթով Արտակ Նազարյանը խփել է իր ձախ ուսին դաջված խաչին, ինքն էլ հարվածել է Նազարյանին:
Տուժողի իրավահաջորդի պաշտպան, փաստաբան Մուշեղ Շուշանյանը հայտարարեց, որ Հարութիկ Կիրակոսյանը Արտակ Նազարյանի սպանության հետ կապ չունի, որ նա հանիրավի մեղադրվել է, նրա նկատմամբ ռազմական ոստիկանությունում դրսեւորվել է անմարդկային վերաբերմունք, Կիրակոսյանը ենթարկվել է դաժան խոշտանգումների, շուրջ մեկ տարի ապօրինի պահվել է կալանքի տակ միայն այն բանի համար, որ, ի տարբերություն գործում ներգրավված զինվոր վկաների, չի վկայել իր ծառայակիցների դեմ: Շուշանյանի խոսքերով՝ նախաքննական մարմինները հորինել են Արտակ Նազարյանի ինքնասպանության վերաբերյալ կեղծ վարկածներ, փորձ է արվել Հարութիկ Կիրակոսյանից ստանալ դա հաստատող ցուցմունքներ:
Մ. Շուշանյանը միջնորդեց, որպեսզի ռազմական ոստիկանությունում Հ. Կիրակոսյանի ծեծի վերաբերյալ դատարանը դիմի դատախազություն: Պաշտպան Հրանտ Գեւորգյանը դատարանին միջնորդեց Վանաձորի մեկուսարանից պահանջել Հարութիկ Կիրակոսյանի ոտքի բուժման մասին տեղեկանքներ: Դատարանը որոշեց Մ. Շուշանյանի միջնորդությունը քննարկել դատավարության վերջնական փուլում:
Մեղադրող Հարություն Հարությունյանը, գտնելով, որ էական հակասություններ կան ամբաստանյալ Ադիբեկ Հովհաննիսյանի դատարանում տված եւ նախաքննական ցուցմունքների միջեւ, միջնորդեց հրապարակել նրա նախաքննական ցուցմուքները; Դատարանը բավարարեց միջնորդությունը: Հունիսի 26-ին հրապարակվեցին այդ ցուցմունքներից երկուսը: Ադիբեկ Հովհաննիսյանը, պատասխանելով դատավարության մասնակիցների հարցերին, ասաց, որ նախաքննության ընթացքում ինքը ցուցմունքներ է տվել ծեծի եւ ճնշման հետեւանքով, այդ ցուցմունքները ճշմարիտ չեն: Խաղաղ պայմաններում զոհված զինծառայող Տիգրան Օհանջանյանի մայրը՝ Գոհար Սարգսյանը, դատական նիստի ընդմիջմանը վիրավորանքներ հնչեցրեց մեղադրող Հարություն Հարությունյանի հասցեին, ով եղել է նրա որդու մահվան գործով մեղադրողը: Դատավոր Սամվել Մարդանյանը Գոհար Սարգսյանին զգուշացրեց, որ դատարանի տարածքում պետք է դրսեւորել փոխադարձ հարգանք: Դատական հաջորդ նիստը կկայանա հունիսի 27-ին:
Ոսկան ՍԱՐԳՍՅԱՆ
