Այսօր Շիրակի մարզի ընդհանուր իրավասության դատարանում սկսվեց ու նույն վայրկյանին էլ հետաձգվեց Շիրակի մարզի քննչական բաժնի հատկապես կարևորագույն գործերով ավագ քննիչ Վահրամ Բեյբությանին ավտովթարի ենթարկած անձի`23-ամյա Ռաֆիկ Մուրադյանի դատավարությունը:
Հիշեցնենք, որ այս երիտասարդը երկարամյա քննիչին ավտովթարի էր ենթարկել Գյումրու քաղաքապետի դստեր փեսացուի սպանության օրը`ապրիլի 12-ին: Վահրամ Բեյբությանն այդ աղմկահարույց գործով քննչական խմբի անդամներից էր: Ռաֆիկ Մուրադյանը ոստիկանության շենքի դիմաց` գիշերվա ժամը 01.00-ի սահմաններում, անասելի արագությամբ վարելով իր մեքենան, վրաերթի էր ենթարկել փողոցն անցնող Վահրամ Բեյբությանին, ու նրան անօգնական թողնելով դիմել էր փախուստի: 58-ամյա քննիչը մահացել էր շտապօգնության մեքենայի մեջ: Սա դիտավորյալ սպանությու՞ն էր, թե՞ անզգուշությամբ պատճառած մահ, կպարզի դատարանը: Նրա դեմ հարուցվել է քրեական գործ`քրեական օրենսգրքի երկու հոդվածներով` 242 հոդվածի 2-րդ մասով և 240 հոդվածով:
Դատական նիստը մեկ շաբաթով հետաձգվեց` ամբաստանյալի շահերի պաշտպանի չներկայանալու պատճառով:
Նունե ԱՐԵՎՇԱՏՅԱՆ
Կարդացեք նաև
