Ըստ լրագրող Գոհար Վեզիրյանի՝ Նանսենի թանգարանի շուրջ աղմուկը ծրագրված ապատեղեկատվություն էր, քանի որ թանգարանի համար նախատեսված հատվածը բետոնապատ տարածք է: Քաղաքացիական ակտիվիստ Աննա Շահնազարյանը, սակայն, պնդում է, որ զբոսայգու ողջ տարածքը կանաչ գոտի է, դրանում առկա բետոնապատ հատվածները՝ նույնպես:
Գոհար Վեզիրյան- Քաղաքացիական ակտիվիստ ձեւակերպումն ինձ համար անհասկանալի ձեւակերպում է: Քաղաքացիական ակտիվիստ լինելը մասնագիտություն չէ, կոչում չէ, դա ամենօրյա աշխատանք է, որը, չգիտես ինչու, մեզանում դարձել է մի առանձին շերտ: Կոնկրետ Նանսենի թանգարանի հետ կապված սկզբում գնաց ապատեղեկատվություն, թե այդտեղ ծառեր են հատվում: Մենք գնում ենք դեպքի վայր եւ արձանագրում ենք, որ այնտեղ որեւէ ծառ չի հատվել: Ապա հետեւում է երկրորդ ապատեղեկատվությունը, թե՝ Նանսենի հիմնադրամը տեղյակ չէ այդ թանգարանից: Մենք դիմում ենք հիմնադրամի տնօրենին, ով ասում է, որ ոչ միայն իրենք տեղյակ են, այլեւ այդ թանգարանը կառուցվում է կառավարության որոշմամբ՝ Նանսենի 150-ամյակի կապակցությամբ: Դրանից հետո գնում է երրորդ ապատեղեկատվությունը, թե քաղաքապետարանը գործընթացից տեղյակ չէ: Հաջորդ օրը քաղաքապետարանը հանդես է գալիս ծավալուն հայտարարությամբ: Երբ մենք գնում-զրուցում ենք բնակիչների հետ, մեզ ասում են, որ երկու աղջիկ եկել-ասել են, որ այդտեղ ռեստորան է կառուցվելու՝ այդպիսով հարուցելով բնակիչների դժգոհությունը: Եվ ես հասկացա, որ այդ ամենն այն կարգի մշակված ապատեղեկատվություն է եղել, որ անգամ ես՝ փորձառու լրագրող լինելով, «կերա այդ կուտը»:
Աննա Շահնազարյան- Ի սկզբանե ահազանգը եղել է այն մասին, որ այգում շինարարություն է ընթանում: Ոչ ոք չի ասել, որ ծառեր են կտրել: Խոսքը կանաչ տարածքի ոչնչացման մասին է: Հիմա հասկանանք՝ ինչ է կանաչ տարածքը: Երեւանի գոտիավորման նախագծով այդ ամբողջ տարածքը, այգին նշված է կանաչ գույնով եւ սահմանված է որպես կանաչ տարածք: Իսկ կանաչ տարածքում շինարարություն անելու համար՝ անկախ նրանից, թե ինչ է կառուցվում, բոլորովին այլ ընթացակարգ է պահանջվում:
Կարդացեք նաև
Գ. Վեզիրյան- Մարգար Օհանյանը երբ այդ այգում ռեստորան էր կառուցում, Դուք ո՞ւր էիք:
Ա. Շահնազարյան- Ես անչափահաս էի: Եթե խոսում եք զուտ քաղաքացիական ակտիվության եւ շարժման մասին, ապա պետք է արձանագրեք, որ Դուք գործ ունեք երիտասարդ շարժման հետ: Եվ երբ կանաչ տարածքում թանգարան կառուցելու մասին է խոսք գնում, եւ քաղաքապետարանի կողմից չեն ներկայացվում այդ ծրագրի վերաբերյալ բոլոր անհրաժեշտ փաստարկները, այդ դեպքում լուրջ կասկածներ են առաջանում:
Գ. Վեզիրյան- Կասկածներ չեն առաջանում, Դուք եք այդ կասկածները սերմանում մարդկանց մեջ: Ինչո՞ւ եք գնում բնակիչներին խաբում, ասում՝ այստեղ ռեստորան է կառուցվելու:
Ա. Շահնազարյան- Այդպիսի բան չկա: Մենք ունենք հիմնավոր դժգոհություններ, այսինքն՝ բնակիչներն են առաջին հերթին…
Գ. Վեզիրյան- Դուք ստում եք:
Ա. Շահնազարյան- Դուք իրավունք չունեք նման մեղադրանքներ հնչեցնելու: Ես հիմա ունեմ փաստաթղթեր, որտեղ ավելի քան 250 բնակիչներ իրենց ստորագրությամբ հիմնավորել են իրենց դժգոհությունները:
Գ. Վեզիրյան- Տվեք ինձ այդ ստորագրությունները, եւ ես հատ-հատ բացահայտելու եմ, թե Դուք ինչպես եք նրանց ասել, որ այդտեղ ռեստորան է կառուցվելու, եւ ստորագրությունները խաբեությամբ կորզել եք:
Ա. Շահնազարյան- Ուշադիր եղեք Ձեր արտահայտություններում, ես կարող եմ Ձեզ դատի տալ: Եթե մենք որեւէ մեկին խաբել ենք՝ ապացուցեք, կոչ եմ անում գնալ յուրաքանչյուր հասցեով եւ պարզել: Կա քաղաքապետի որոշումը, որով այդ տարածքը հաստատվում է որպես կանաչ տարածք: Վերջ:
Գ. Վեզիրյան- Էդ քաղաքապետի ասածը հիմա Ձեր համար դարձավ վերին ճշմարտություն, հա՞: Այսինքն՝ երբ որ Ձեզ պետք է՝ քաղաքապետը վերին ճշմարտություն է, իսկ երբ պետք չէ՝ վստահելի չէ:
Ա. Շահնազարյան- Այո, կոնկրետ այս դեպքում այս փաստաթուղթը վերին ճշմարտություն է, եւ դա կանաչ տարածք է:
Գ. Վեզիրյան- Դա կանաչ տարածք չէ:
«Առավոտ»- Ի վերջո, կանաչ տարածքը միայն ծառերն ու խոտերը չեն: Բացի այդ, Գոհար, կարծում եք, հնարավոր չէ՞ր ավելի լավ տարբերակ գտնել եւ թանգարանը կառուցել ոչ թե զբոսայգում, այլ որեւէ այլ տեղ: Առանց այդ էլ Երեւանում կանաչ տարածքներ գրեթե չեն մնացել:
Գ. Վեզիրյան- Ծառեր պիտի չկտրվեն, դա է ինձ համար էականը: Իսկ այն վայրերում, որտեղ խոզանոց է, ավելի լավ է՝ այնտեղ թանգարան կառուցվի, քան վաղը մեկը գա՝ թաթը դնի եւ սուպերմարկետ կառուցի:
Ա. Շահնազարյան- Գոհար, այսօր գործընթաց է գնում, որպեսզի մարդիկ իրենց իրավունքներին եւ հանրային սեփականությանը տեր կանգնեն: Դուք, որպես լրագրող, փոխանակ ուրախանաք, որ այդ գործընթացում կա շարժ, չեմ հասկանում՝ ինչ կեցվածք եք ընդունում:
Գ. Վեզիրյան- Ախր, ինչ շարժ, դա անհեթեթ պատմություն է: Երբ որ Երեւանում ամեն օր աղաղակող բնապահպանական խախտումներ են լինում, ու դրանց համար այդ նույն աղմուկը չի բարձրացվում, թույլ տվեք չհավատալ ձեր անկեղծությանը:
Ա. Շահնազարյան- Գոհար, Դուք ի՞նչ աբսուրդից եք խոսում:
Գ. Վեզիրյան- Ես աբսուրդից խոսում եմ անկեղծ, իսկ Դուք խոսում եք գրանտ վերցնելով: Այդ գրանտային միջոցներն ավելի լավ հարցերի լուծմանն ուղղեք:
Ա. Շահնազարյան- Դուք՝ որպես լրագրող, եթե ունեք փաստ, որ որեւէ կազմակերպություն գրանտակեր է, ինչը ենթադրում է փողերի յուրացում, ուրեմն Դուք պարտավոր եք այդ մասին բարձրաձայնել եւ ասել՝ կոնկրետ այս կազմակերպությունը փողերի յուրացմամբ է զբաղված:
Գ. Վեզիրյան- Այն բոլոր մարդիկ, ովքեր հասարակությանը գցում են ապատեղեկատվության մեջ եւ դա անում են ուղղորդված եւ նպատակային, դրանք ինձ համար փայտոջիլներ են:
Ա. Շահնազարյան- Այդ դուք եք հիմա ապատեղեկատվության մեջ գցում, եթե Դուք ասում եք, որ զբոսայգու ամբողջ տարածքը կանաչ տարածք չէ, ապա Դուք առավել քան փայտոջիլ եք:
Բանավեճը վարեց
ԱՐԵՎԻԿ ՍԱՀԱԿՅԱՆԸ
Նախագիծն իրականացվում է «Բաց հասարակության հիմնադրամներ-Հայաստան» ծրագրի շրջանակներում:
Լրագրողի եւ քաղաքացիական ակտիվիստի ԴԵՄ ԱՌ ԴԵՄ բանավեճն ամբողջությամբ կարող եք դիտել aravot.am կայքում:
