Հարգելի ԶԼՄ աշխատակիցներ, ես 20.06-ին Կիեւյան կամրջի տակ հայտնաբերված 22-ամյա երիտասարդի` Ներսես Հակոբյանի ավագ քույրն եմ: Շնորհակալություն եմ հայտնում ձեզ բոլորիդ օպերատիվ եւ ճշգրիտ տեղեկատվության տրամադրման համար, դուք հնարավոր բոլոր եղանակներով անսահման ցավ պատճառեցիք հանգուցյալի ընտանիքի անդամներին: Ամենայն հարգանքով մոտենալով ձեր մասնագիտական պարտականություններին` խնդրում եմ հնարավորին սեղմ ժամկետներում կարգի հրավիրել ձեր կայքերը եւ եղբորս մահվան մասին տեղեկատվությունը դարձնել այնպիսին, որ նրա հարազատները կարդալուց կաթվածահար չլինեն: Ես չեմ ուզում, որ իմ ճարահատյալ մայրը որոշ ժամանակ անց ինտերնետում տեսնի իր հանգուցյալ որդու դիակի նկարները կամ տեսանյութ դիտի այդ մասին: Որոշ կայքերից օրինակ վերցնելովՙ գոնե հնարավոր էր կրճատել եղբորս անվան տառերը եւ չհայտնել նրա ընտանիքի մասին մանրամասներ: Իմ տատիկը, որը երկրում չէ եւ չի կարող վշտալ մեզ հետ միասին, տեղեկացել է այս դժբախտության մասին ձեր «շնորհիվ» եւ այժմ գտնվում է շատ ծանր հոգեբանական եւ ֆիզիկական վիճակում:
Ես խնդրում եմ մարդկային լինել եւ նվազագույնի հասցնել այդ տեղեկատվությունը, այլապես մենք ստիպված կլինենք դիմել այլ միջոցների:
Կանխավ շնորհակալություն:
ԼԻԼԻԹ ՀԱԿՈԲՅԱՆ
Կարդացեք նաև
«Ազգ»
