Ուկրաինայում դատարանը կարգադրել է անցկացնել երկրի նախկին վարչապետ Յուլիա Տիմոշենկոյի բժշկական զննումը և մինչև հուլիսի 10 հետաձգել հարկերից խուսափելու գործի լսումը:
Խարկովի դատարանի կողմից երկուշաբթի օրը կայացված որոշման համաձայն, անհրաժեշտ է նախ տեղեկանալ, արդյոք կառավարության նախկին ղեկավարն ունակ է ներկա գտնվելու դատավարությանը:
Տիմոշենկոն այժմ գտնվում է հիվանդանոցում՝ մեջքի հետ կապված խնդիրների պատճառով:
Ուկրաինայի նախկին վարչապետ Տիմոշենկոն մեղադրվում է 1990-ական թվականներին «Միավորված էներգահամակարգեր» կազմակերպությունը գլխավորելու ընթացքում հարկերից խուսափելու մեջ:
Կարդացեք նաև
Յուլիա Տիմոշենկոն արդեն իսկ դատապարտվել է 7 տարվա ազատազրկման՝ Ռուսաստանի հետ 2009 թվականին բնական գազի վերաբերյալ պայմանագիրը կնքելու ընթացքում պաշտոնական դիրքը չարաշահելու մեղադրանքներով: Մեղադրող կողմի համաձայն, գործարքի պատճառով Ուկրաինային հասցվել է 190 միլիոն դոլարի վնաս: Նա սակայն հերքում է իրեն ներկայացված մեղադրանքները՝ պնդելով, որ դրանք քաղաքական վրեժխնդրություն են ներկայիս նախագահ Վիկտոր Յանուկովիչի կողմից:
Եվրոպական Միությունը, Միացյալ Նահանգները և իրավապաշտպան մի շարք կազմակերպություններ որպես քաղաքական դրդապատճառներ ունեցող են որակավորել Տիմոշենկոյին ներկայացված մեղադրանքները:
«Ամերիկայի ձայն» ռադիոկայան
