Խորին ափսոսանքով տեղեկացանք, որ 2012 թ. հունիսի 16-ին լույս է տեսել Փարիզում հրատարակվող «Աշխարհ» պարբերականի վերջին համարը: Թերթը, որը լույս էր տեսնում 1950 թվականից, վերջնականապես փակվել է նյութական միջոցներ չունենալու պատճառով:Սփյուռքի ցանկացած լրատվամիջոցի կորուստը հարված է ոչ միայն տվյալ երկրի համայնքի համար, այլեւ հայ մշակույթին ընդհանրապես: Առավել եւս, եթե խոսք է գնում հարուստ ավանդույթներ ունեցող հայալեզու մամուլի մասին:
Ֆրանսահայ համայնքում, որն ի դեպ աշխարհի ամենահայաշատ համայքներից մեկն է, հայկական լրատվամիջոցները ծանր ժամանակներ են ապրում. մի քանի տարի առաջ փակվեց հայալեզու «Յառաջ»-ը, այժմ` «Աշխարհը»: Վատ է վիճակը ֆրանսալեզո Magazine France-Arménie-ում, որը ստիպված փոխել է ֆորմատը: Նյութական դժվարություններ ունի նաեւ
Nouvelles d’Arménie ամսագիրը: Դժվար պայմաններում է գործում Ֆրանսիայում լուլս տեսնող եւ
այս պահին արդեն որպես հայալեզու մամուլ միակը մնացած «Նոր Յառաջը»:
Լրատվամիջոցների համահայկական ընկերակցությունը բազմիցս նշել է Սփյուռքի հայկական լրատվամիջոցներին ՀՀ պետական աջակցության ծրագիր ունենալու անհրաժեշտության մասին:
Ակնհայտ է, որ Հայաստանի իշխանությունները չպետք է Սփյուռքի լրատվամիջոցները դիտարկեն պարզապես որպես այլ երկրում գործող մասնավոր բիզնես, որը պետք է ապրի եւ գործի զուտ շուկայի օրենքներով: Այդ լրատվամիջոցների ճնշող մեծամասնությունն իր վրա է վերցրել լեզվի եւ մշակութային ինքնության պահպանման, հայապահպանության, կրթական խնդիրների լուծման ծանր մի բեռ, աշխատում է ինքնանվիրումով, մեծամասամբ առանց որեւէ նյութական շահ հետապնդելու եւ մեծ դերակատարություն ունի Հայաստան–Սփյուռք գործակցության ամրապնդման գործում:
Ճիշտ չի լինի պնդել, թե համազգային խնդիրների տեսանկյունից ՀՀ-ում չեն կարեւորում Սփյուռքի հետ այդ գործակցությունը: Հայաստան-Սփյուռք գործակցությունն այնքան է կարեւորվել ՀՀ-ի կողմից, որ ստեղծվել է Սփյուռքի նախարարություն, որը կոչված է ՀՀ Նախագահի ընդհանուր ղեկավարությամբ մշակել և իրականացնել ՀՀ կառավարության քաղաքականությունը Հայաստանի և Սփյուռքի հետ կապերի ամրապնդման, հասարակական կառույցների հետ գործակցության զարգացման, հայապահպանության, Սփյուռքի ներուժի հայտնաբերման, հայրենադարձության եւ այլ բնագավառներում:
Լրատվամիջոցների համահայկական ընկերակցությունը գտնում է, որ այդ քաղաքականության շրջանակներում պետք է հատուկ մոտեցում ցուցաբերվի Սփյուռքում գործող հայկական մամուլի եւ առանձնապես հայալեզու մամուլի՝ որպես հայապահպանության հենասյուներից մեկի նկատմամբ։ Անհրաժեշտ է այս հարցում փնտրել եւ գտնել խելամիտ լուծումներ Սփյուռքում գործող հեղինակավոր մամուլի միջոցներին նյութապես աջակցելու հարցում՝ առավել եւս, որ վերջիններս հանդիսանում են նաեւ ազգային եւ մշակութային մեծագույն արժեք: Հապաղել այս հարցում այլեւս չի կարելի:
Տիգրան Հարությունյան
Լրատվամիջոցների համահայկական ընկերակցության նախագահ
