Օրերս Ավանի Սուրբ Աստվածածին եկեղեցու «Մանանա» ծրագրի անդամները մասնակցեցին դեպի Տաթեւի վանական համալիր ուխտագնացությանը: Aravot.am-ի հետ զրույցում ուխտագնացության կազմակերպիչ, Մայր Աթոռ Սուրբ Էջմիածնի միաբան Վարդան սարկավագ Ասլանյանը փաստեց, որ յուրաքանչյուրի համար ուխտագնացությունն առիթ է՝ ներաշխարհը քննելու եւ նվիրական ցանկություններն Աստծուն հայտնի դարձնելու համար: «Դեպի վանքեր ու սրբատեղիներ կազմակերպվող ուխտագնացությունները մեզ հիշեցում են՝ կյանքը երկրից երկինք ուղղված երկար ճանապարհ է, որը պետք է անցնել հավատով եւ անշեղորեն: Հասնելով սարերի գագաթին ծվարած Տաթեւի վանքը՝ այն զգացողությունն ունեինք, ասես կտրվել ենք աշխարհից: Տաթեւի վանքում աստվածային շունչ է զգացվում ոչ միայն բնության գեղատեսիլ պատկերների եւ եզակի ճարտարապետության շնորհիվ, այլ հատկապես այն պատճառով, որ դարեր շարունակ այստեղ աղոթք է հնչել»,-ասաց հոգեւորականը: Նա հավելեց, որ ուխտավորները մասնակցել են կիրակնօրյա հանդիսավոր ժամերգություններին եւ շաբաթօրյա գիշերային հսկմանը:
Նորքի Սուրբ Սարգիս եկեղեցու «Մանանա» ծրագրի անդամ Նորա Սարգսյանն ասաց, որ գիշերային հսկումն ազդեցիկ էր եւ խորհելու առիթ էր տալիս. «Հաջորդաբար փոխարինում էինք իրար՝ ընթերցելով սաղմոսներ: Դա մեզանում հոգեւորը հաստատելու եւ ամրապնդելու միջոց է: Առաջին անգամ ինձ այդքան մոտ զգացի Աստծուն` առանց խոչնդոտող մտքերի»:
Կարդացեք նաև
Ուխտագնացության երկրորդ օրը մասնակիցները ծանոթացան Տաթեւի վանական համալիրին՝ այցելելով Սբ. Պողոս-Պետրոս, Սբ. Գրիգոր Լուսավորիչ եւ Սբ. Աստվածածին եկեղեցիներ եւ Գրիգոր Տաթեւացու մատուռ-դամբարան: Տեսան նաեւ Խրիմյան Հայրիկի տնկած տանձենին եւ Xդ. սկզբին կառուցված ճոճվող «Գավազանը». ըստ ավանդույթի՝ այն սարսափեցրել է վանք արշաված սելջուկներին, ովքեր ձորից ցած են նետվել՝ գավազանը համարելով «սատանայի աշտարակ»: Հաջորդիվ ուխտավորները եղան առաջնորդարանում, ժամանակի կարեւոր կրթական կենտրոն հանդիսացող Տաթեւի համալսարանում, հացատանը, վանականների խցերում, ընթրեցին սեղանատանը եւ գիշերեցին մեծ բուխարիով սենյակում:
«Վանականների խցերի մեջ մտնելով` կարծես հասկանում ես, թե ժամանակին ինչպես են նրանք ապրել դրանցում: Առհասարակ, երիտասարդների այցելությունները վանական համալիրներ միավորում է նրանց»,-կարծում է Ավանի սուրբ Աստվածածին եկեղեցու «Ծիրանավոր» երիտասարդաց միության ատենապետ Հասմիկ Միրզոյանը:
Այցի ընթացքում մասնակիցները եղան նաեւ Վայքի Սուրբ Տրդատ եւ Տաթեւ գյուղի Սուրբ Մինաս եկեղեցիներում, ինչպես նաեւ՝ բնության արտասովոր հրաշք համարվող «Սատանի կամրջում»:
Լուիզա ՍՈՒՔԻԱՍՅԱՆ
