«18 տարի խմբագիր լինելով՝ յուրաքանչյուր տեքստ կարդալուց զգում եմ, թե որքան քրտինք է թափվել դրա վրա: Կառավարության ծրագիրն ուսումնասիրելով՝ կարող եմ եզրակացնել, որ հեղինակները դրա վրա շատ ջանք չեն թափել, հակառակ դեպքում ծրագիրն ավելի մանրամասն կլիներ»,-այսօր «Peoplemeter» մամուլի ակումբում ասաց «Առավոտ» օրաթերթի գլխավոր խմբագիր Արամ Աբրահամյանը:
Խոսելով վերանշանակված վարչապետից՝ նա նշեց, որ առաջիկայում վերլուծության առիթ կտա այն հանգամանքը, թե ինչու Տիգրան Սարգսյանի առաջարկած նախորդ ծրագիրը չի իրականացվել. «Քիչ է պարզապես ասել, որ տնտեսական ճգնաժամ է: Այն միշտ էլ լինելու է, քանի որ աշխարհի զարգացած եւ թերզարգացած երկրները սովոր են ավելի շատ ծախսել, քան վաստակել: Նախորդ ծրագիրը չիրականացնելն արդեն կասկածելի է: Իսկ նոր ծրագրում, օրինակ, նշվում է 5 տարվա ընթացքում աշխատավարձի նվազագույն չափը 70.000 դրամի հասցնելու մասին, բայց դրանով ընտանիք չեն պահում»:
Պարոն Աբրահամյանը միաժամանակ փաստեց, որ մինչ նոր կառավարության ձեւավորումը «լիցքաթափվել» է քաղաքական մշակույթը, իսկ հասարակությունը ձգտում է ժողովրդավարության: Ըստ Արամ Աբրահամյանի, Հայաստանը հեռու չէ Եվրամիության հետ ազատ գոտու մասին պայմանագրի կնքումից:
Կարդացեք նաև
Անկախ ԲՀԿ-ի՝ իշխանական կոալիցիայի մեջ մտնելու հանգամանքից, Արամ Աբրահամյանը դրական գնահատեց կառավարությունում իշխանամետ ուժերի գերակայությունը: Բանախոսը նաեւ նշեց, որ կառավարության նոր ծրագիրը դժվարությամբ է ընդունվել, քանի որ հեշտ չէ օլիգարխներին քյաբաբանոցներից բերել խորհրդարան. «Այնուամենայնիվ, անկախ նախագահական եւ խորհրդարանական ընտրություններից, հասարակությունը պետք է պայքարի իր իրավունքների համար, որովհետեւ խաղաղ ճնշմամբ կարելի է ազդել օրենքների որակի վրա: Կառավարությանը հակադրվել է պետք ՝ Մաշտոցի պուրակից մինչ «Հարսնաքարի» ծեծ»:
Լուիզա ՍՈՒՔԻԱՍՅԱՆ
