Վերջին շրջանում կառավարության ծրագրի վերաբերյալ տարատեսակ կարծիքներ են հնչել, եւ նույնիսկ որոշ պատգամավորներ հայտարարել են, որ այն դժվար էլ իրականություն դառնա: Այսօր «Փաստարկ» ակումբում լրագրողների հետ հանդիպման ժամանակ Ազգային ժողովի ֆինանսավարկային եւ բյուջետային մշտական հանձնաժողովի նախագահ Գագիկ Մինասյանը վստահեցրեց, որ այն, ինչ նշված է ծրագրում՝ կդառնա իրականություն, որի շնորհիվ Հայաստանի տնտեսությունը կունենա առաջանցիկ զարգացում:
Պարոն Մինասյանի ներկայացմամբ` միջազգային տնտեսությունում առկա բացասական երեւույթների պայմաններում, կառավարության ծրագրած 5-7 % տնտեսական աճը հնարավոր կլինի իրականություն դարձնել ներքին ռեսուրսների համախմբմամբ. «Եթե մենք կարողանանք ներքին տնտեսվարողների համար ստեղծել հավասար մրցակցային դաշտ, եթե մենք կարողանանք հաջողության հասնել ապրանքի որակ-ապրանքի գին հարաբերակցությունում: Եվ միայն այս պարագայում մենք կարող ենք արտահանման ուղղությամբ առաջանցիկ աճ ապահովել»:
ԱԺ ֆինանսավարկային եւ բյուջետային մշտական հանձնաժողովի նախագահը վստահեցրեց, որ կառավարությունը առաջիկա 5 տարիներին ակտիվորեն պայքարելու է տնտեսությունում հակամրցակցային երեւույթների դեմ, եւ խոստովանեց, որ մեր տնտեսությունում առկա է ստվերն ու գերիշխող դիրքի չարաշահումը:
Ըստ Գագիկ Մինասյանի, կառավարությունն արտահանման ուղղությամբ աջակցելու է տնտեսվարողներին` նոր միջազգային շուկաներ գտնելու ուղղությամբ` հատկապես գյուղմթերքների եւ արդյունաբերական ապրանքերի մասով: Վերջերս Արժույթի միջազգային հիմնադրամն ու Համաշխարհային բանկն այս տարի Հայաստանի տնտեսական աճը 4-4.1% են կանխատեսել: Հարցին, թե ինչպե՞ս է այս պարագայում կառավարությունը 5-7% աճ խոստանում, Գագիկ Մինասյանը պատասխանեց, որ միջազգային կառույցները դեռ չեն տեսել ծրագրի իրականացումը. «որը մենք իրականացնելու ենք: Սա կառավարության ակնկալիքն է ներկայիս քաղաքականության պայմաններում»:
Կարդացեք նաև
Անդրադառնալով ՀՀԿ պատգամավոր Ռուբեն Հայրապետյանին պատկանող «Հարսնաքար» ռեստորանային համալիրում տեղի ունեցած ծեծկռտուքին, երբ անվտանգության աշխատակիցները մահացու ծեծել են ռազմական բժիշկներին, պարոն Մինասյանն ասաց. «Դա իսկապես անթույլատրելի երեւույթ է: Ցանկացած քաղաքակիրթ երկրի համար նման դրսեւորումները պետք է չափազանց հրապարակային եւ հանգամանալից քննադատվեն բոլոր քաղաքական ուժերի կողմից: «Հարսնաքարի» սեփականատերն էլ շատ հստակ արտահայտվել է այդ այլանդակ դրսեւորումների նկատմամբ, եւ վերաբերմունքն այդ դրսեւորումում պետք է լինի չափազանց նեգատիվ եւ մեղավորները օրենքի ողջ խստությամբ պետք է պատասխանատվության ենթարկվեն: Սա է միակ գրավականը, որ հասարակությունը կարող է ապահովագրված զգալ նման երեւույթներից»:
Նելլի ԲԱԲԱՅԱՆ
