Այս պահին ՀՀ գիտությունների ազգային ակադեմիայի (ՀՀ ԳԱԱ) նախագահության նիստերի դահլիճում շարունակվում է «Հայկական լեռնաշխարհի պատմամշակութային ժառանգությունը» թեմայով միջազգային գիտաժողովը, որի ընթացքում զեկուցումներով հանդես են գալիս գիտնականներ Հայաստանից, Արցախից եւ արտերկրից:
Ելույթում ԳԱԱ նախագահ Ռադիկ Մարտիրոսյանը նշեց, որ վերջին տասնամյակների գիտատեխնիկական առաջընթացը հնարավորություն է տվել առավել մանրակրկիտ ուսումնասիրել գիտական աղբյուրները. «Սակայն, հատկապես մեր հարեւան երկրներում, հայտնվել են չակերտավոր գիտնականներ, ովքեր փորձում են խեղաթյուրել եւ իրենց վերագրել Հայաստանին պատկանող պատմամշակութային ժառանգությունը: Մեր խնդիրն է՝ ցուցաբերել համապատասխան գիտական մոտեցում՝ հակահարված տալով նրանց»: Պարոն Մարտիրոսյանը հավելեց, որ գիտաժողովը կնպաստի պատմագիտության եւ հայագիտության տարբեր ոլորտների մասնագետների գործնական կապերի ընդլայնմանը:
Կարեւորելով մեծածավալ հայկական պատմամշակութային ժառանգության պահպանումը՝ մշակույթի նախարար Հասմիկ Պողոսյանը ողջունեց այն հանգամանքը, որ գիտաժողովի հաջորդ նիստը տեղի է ունենալու Արցախում. «Կցանկանայի, որ նման հանդիպում կազմակերպվի նաեւ տարածաշրջանային մակարդակով, ինչը հնարավորություն կընձեռի գործընթացում ներգրավվել հարեւան երկրների հասարակական կառույցներին: Մյուս կողմից, կարեւոր է գիտնականների ելույթների պրակտիկ շարունակությունը»:
Կարդացեք նաև
ԳԱԱ կազմկոմիտեի անդամ Աբրահամ Տերյանը հանդես է գալու «Հայ վանականության սկիզբը Հայաստանում» զեկույցով. «Ոսկեդարյան գրական աղբյուրները փաստում են, որ դեռեւս 5-րդ դարում Հայաստանում վանականություն կար: Բարեբախտաբար, Մատենադարանում այդ աղբյուրների պակաս չունենք, բայց պետք է մտածել հին վանքերի եւ եկեղեցիների մնացորդները հայնաբերելու եւ եղածը պահպանելու ուղղությամբ»:
Լուիզա ՍՈՒՔՒԱՍՅԱՆ
