Սեպտեմբերին Ագարակ քաղաքում կկայանա համայնքի ղեկավարի եւ ավագանու ընտրություն: Սյունիքի մարզի 5000-ից ավելի բնակչություն ունեցող ամենահարավային քաղաքում քաղաքապետի պաշտոնի համար առաջադրվող բոլոր թեկնածուները դեռեւս պաշտոնապես չեն հայտարարել իրենց առաջադրման մասին, բայց քաղաքի բնակիչներն արդեն նախնական գիտեն, թե ովքեր են առաջադրվելու առաջիկա ընտրությանը: Ըստ նախնական այդ տվյալների` քաղաքապետի պաշտոնի համար, ամենայն հավանականությամբ, այստեղ կպայքարեն 3 թեկնածու: Ագարակի ներկայիս քաղաքապետ Մխիթար Զաքարյանը «Առավոտի» Սյունիքի մարզի թղթակցի հետ ունեցած հանդիպման ժամանակ հայտարարեց, որ ինքն առաջադրելու է իր թեկնածությունը երկրորդ անգամ:
«Չկատարված ծրագրեր կան, որոնք ես դեռ պետք է իրագործեմ Ագարակի համար: Ես 2008 թվականին շատ ծանր ժամանակ համայնքի ղեկավարի պաշտոնը ստանձնեցի. ճգնաժամ, կոմբինատը կանգնած, պարտքեր, համայնքային ենթակայության կառույցների` կոմունալի, մանկապարտեզի, երաժշտական դպրոցի 150 աշխատող 4 ամսվա աշխատավարձ չէր ստացել եւ մի շարք այլ չլուծված խնդիրներ: Քաղաքապետ ընտրվելուց հետո առաջին 2 տարին նվիրեցի պարտքերը մարելուն, իսկ այսօր արդեն մենք զարգացման փուլում ենք, բավականին աշխատանքներ են կատարվել քաղաքում, մի շարք ծրագրեր էլ առաջիկայում կիրագործվեն քաղաքում: Ես սիրում եմ իմ աշխատանքը, իմ քաղաքը եւ անելիքներ ունեմ այստեղ», – ասել է Մխիթար Զաքարյանը եւ հավելել, որ ինքը դեմ չէ բազմակարծությանն ու այլ թեկնածուների առաջադրմանը:
Զրուցակցիս կարծիքով սեպտեմբերին Ագարակում անցկացվելու են աննախադեպ դեմոկրատական, ազատ ու արդար ընտրություններ: «Ես ոչ մեկին չեմ ստիպելու եւ չեմ ասելու ինձ ընտրել, յուրաքանչյուրը թող այդ օրը գա եւ իր ցանկությամբ ընտրություն անի: Ես նույնիսկ չեմ ուզում նախընտրական շտաբ բացել: Աշխատանքներից չեմ ուզում շեղվենք. ո’չ ես մեկ ամիս քաղաքապետի իմ աշխատանքից կտրվեմ, ո’չ էլ ժողովրդին իրենց աշխատանքից շեղենք: Ես տնտեսագետ եմ մասնագիտությամբ եւ տնտեսագետի աչքերով եմ նայում բոլոր գորընթացներին: Ճիշտ եմ գտնում, որ նախըտրրական կամ ցանկացած գործընթացներիից տնտեսությունը չպետք է տուժի ու եթե այսօր հնարավոր է նախընտրական շտաբ չբացելով ընտրություն անցկացնել` ապա չարժե բացել եւ շեղվել առօրյա գործընթացներից: Ես բազմակարծության կողմնակից եմ եւ յուրանքանչյուրի կարծիքն եմ պատրաստ լսել, եթե ճշմարտության հատիկ լինի: Ինձ նույնպես հետաքրքիր է, թե ովքեր կառաջադրվեն եւ թե ինչպիսի ընտրություն կկատարի բնակչությունը, որից էլ ես կանեմ իմ հետեւությունները: Կհասկանամ, թե որտե՞ղ եմ թերացել, ի՞նչ անելիքներ ունեմ անելու, ինչպե՞ս է գնահատում ժողովուրդն իմ կատարած աշխատանքը», – հավելում է Մխիթար Զաքարյանը եւ կարծում, որ ագարակցիների կատարած ընտրության արդյունքները կօգնեն ճիշտ ուղորդել իր հետագա գործունեությունը:
«Ագարակ քաղաքը վերջին տարիներին զարգացում է ապրում», -այս մասին փաստում են հենց իրենք` ագարակցիները: Քաղաքում կատարված աշխատանքներին եւ նախատեսված ծրագրերին կանդրադառնանք «Առավոտի» հետագա թողարկումներում:
Մերի ՍՈՂՈՄՈՆՅԱՆ
