«Ութ ամսվա կառավարության ծրագիր: «Հոգնած» կառավարության ծրագիր՝ «հոգնած» նախարարներով». սա առողջապահության նախկին նախարար Արարատ Մկրտչյանի գնահատականն է կառավարության ծրագրին: «Առավոտի» հետ զրույցում նա նաեւ հավելեց. «Այս մարդիկ ոչ մասնակցություն են ունեցել ծրագրի կազմմանը, ոչ ցանկություն, ոչ էլ նպատակ ունեն հնգամյա ծրագիր ներկայացնելու: Ամենացավալին դա է: Կառավարության ծրագրում, ի մասնավորի՝ սոցիալական ոլորտի կարգավորման առումով, օրենսդրական դաշտը բարելավելու ոչ մի խոսք չկա: Այսինքն՝ որեւէ ոլորտը կանոնակարգող նոր օրենսդրական ակտերի կարիք չկա՞: Հինգ տարի օրենսդրորեն կարգավորելու խնդիր չունե՞ն: Մինչդեռ առողջապահական ոլորտում մի շարք նոր օրենքների անհրաժեշտություն կա, դրանք իրենց արդեն սպառել են»:
«Առավոտ» օրաթերթ
