«Սիվիլիթաս» հիմնադրամի այսօրվա բանավեճին, որին հրավիրված էին խորհրդարան անցած քաղաքական ուժերի ներկայացուցիչներ, մասնակցում էին «Ժառանգություն» կուսակցության վարչության փոխնախագահ Արմեն Մարտիրոսյանը եւ ՀՅԴ-ից Արծվիկ Մինասյանը. Թեման կառավարության ծրագիրն էր:
«Առավոտ» օրաթերթի գլխավոր խմբագիր Արամ Աբրահամյանը, որը վարում էր բանավեճը, առաջարկեց հարցեր ուղղել ոչ միայն ներկա, այլեւ բացակա գործիչներին:
Անդրադառնալով Ազգային ժողովի այս շաբաթ սկսած աշխատանքներին, քննարկումներին, մասնավորապես` կառավարության ծրագրին՝ Արծվիկ Մինասյանը նշեց, որ խորհրդարանի արձագանքը բուռն էր, քաղաքական մեծամասնությունը` «Հանրապետականն» ու «Օրինաց երկիրը» փորձում էին պաշտպանվել կամ ներկայացնել ծրագրի դրական կողմերը, իսկ կոնկրետ իրենց որոշումը օբյեկտիվ է եղել, քանի որ փորձել են ցույց տալ ծրագրի թե դրական, թե բացասական կողմերը: «Կան քաղաքական ուժեր, որոնք միայն քննադատությամբ են հանդես գալիս, ես դրան գնահատական չեմ ուզում տալ: Ամեն դեպքում` առողջ բանավեճ էր: Եվ պետք է ասեմ, որ Հայաստանի ոչ մի կառավարություն այսպիսի ծրագիր չի ունեցել, որին 47 դեմ լինի»,-հավելեց նա:
Արամ Աբրահամյանի այն հարցին՝ դուք կառավարության ծրագրի մեջ արդյոք տեսա՞ք տնտեսական, բիզնես- ծրագիր եւ ինչպես նախկին վարչապետ Հրանտ Բագրատյանն էր ասում՝ ծրագիրը պետք է տարբերել մտադրությունների, ցանկությունների ոլորտից, Արմեն Մարտիրոսյանն էլ պատասխանեց. «Այն, ինչ պատկերացնում է Հրանտ Բագրատյանը, այստեղ չկա: Սա քաղաքական փաստաթուղթ է, աշխատանքային պլան չէ. բայց կարող է նաեւ մեկ նախադասություն գրած լինել ու այն կյանքի կոչել: Նաեւ հնարավոր է` Հրանտ Բագրատյանի ասած ծրագիրը ներկայացնել ու կյանքի չկոչել, ինչպես նախորդի դեպքում եղավ»:
Եվա ՀԱԿՈԲՅԱՆ
