«Հարսնաքարի» անվտանգության աշխատակիցների կողմից օրեր առաջ ծեծված Վահե Ավետյանի ազգականը՝ Ալֆրեդ Ավետյանը, այսօր փոխոստիկանապետ Հունան Պողոսյանից հետաքրքրվեց, թե ինչու «Հարսնաքարը» նախաքննության ընթացքում ժամանակավորապես չեն փակել. «Աշխարհի բոլոր անկյուններում որեւէ տեղ, եթե նման դեպք է պատահում, դեպքի վայրը փակվում է մինչեւ քննչական վարչության արդյունքները պարզվեն, ինչու նմանօրինակ բան Հայաստանում չի կատարվում: Այսինքն այդ ռեստորանը փակվի՝ մինչեւ քննչական վարչությունը վերջնական որոշում անի»:
Պարոն Պողոսյանն էլ հորդորեց մի գրամ անգամ չկասկածել ու հավատալ, որ եթե դրա հարկը լիներ, քննիչը համապատասխան որոշում կաներ. «Դեպքի վայրում անհրաժեշտ զննությունը կատարվել է մինչեւ վերջ, դրա անհրաժեշտությունը, եթե լիներ, կես գրամ մի կասկածեք, որ քննիչի կողմից որոշում կկայացվեր»:
Ալֆրեդ Ավետյանն էլ ասաց, որ Հայաստանին հավատալով է Իրանից 3 տարի առաջ Հայաստան տեղափոխվել, բայց եթե սպասելիքները չարդարանա՝ «Լավատես եմ ամեն ինչում ու հավատացել եմ, որ եկել եմ ու ընդունել Հայաստանի քաղաքացիություն, եթե չհասնեմ նպատակներիս, անձնագիրս տանելու եմ հանձնեմ ու հաջողություն»: Ազգականի դեպքը իրեն եւ զարմացրել եւ հիասթափեցրել է: «Բացի աղոթքից ոչ մի բան չի կարող փրկել, բոլոր հարազատներով միայն աղոթում ենք»,- Վահեի մասին ասաց Ա. Ավետյանը:
Կարդացեք նաև
Փոխոստիկանապետ Հ. Պողոսյանն էլ ասաց, որ գործով 7 ձերբակալվածների նկատմամբ այսօր մեղադրանք կհարուցվի:
Իսկ իրականությանը համապատասխանո՞ւմ են տեղեկությունները, թե ծեծկռտուքի մասնակիցների մի մասը ԱԺ ՀՀԿ պատգամավոր Ռուբեն Հայրապետյանի թիկնազորի անդամներ են, փոխոստիկանապետն ասաց՝ տեղեկություններ չունի. «Մի գրամ մի մտածեք, որ որեւէ մեկն անպատիժ է մնալու: Այս օպերատիվոթյամբ աշխատանք երբեւէ դեռ չի եղել: Նոր հանգամանքների դեպքում կլինեն նոր ձերբակալություններ, բաներ կան, որ տուժողները դեռեւս չեն հիշում»:
Արփինե ՍԻՄՈՆՅԱՆ
