2008 թվականից Գյումրիում սկիզբ առած, երկրաշարժի հետևանքով անօթևան ընտանիքներին բնակարանների կառուցման և տրամադրման գործընթացին, «Շիրակ կենտրոնը» իր մասնակցությունն է ցուցաբերում հիմնականում անօթևան ընտանքիների շահերի ու իրավունքների պաշտպանությամբ, նրանց` բնակարան ստանալու նպատակով փաստաթղթերի փաթեթների ձևավորման գործում աջակցություն ցուցաբերելով և իրազեկելով: Այդ թվում բնակարանների բաշխման վիճակահանություններին մասնակցելու կարգի և ժամանակացույցի վերաբերյալ շահառուներին իրազեկումը նույնպես մենք ենք անում` հեռախոսազանգերի, տնակային ավաններ այցելության և հայտարարությունների միջոցով:
Գյումրիում բնակարանների բաշխման վիճակահանություններին, կապված տվյալ վիճակահանությանը դրված բնակարանների քանակից, մասնակցում են մոտ 500-1500 քաղաքացի, սովորաբար շահառու ընտանիքները ներկայանում են երկու, երեք և անգամ ամբողջ ընտանիքի կազմով: Նրանց՝ 24 տարի տնակներում մի կերպ պատսպարված և բնակարանի սպասող անօթևան ընտանիքի անդամներին կարելի է հասկանալ: Գյումրիում այդ քանակության բազմություն մի կերպ կարող է տեղավորել դրամատիկական թատրոնի դահլիճը, ուր և հիմնականում տեղի են ունենում այդ միջոցառումները:
Անցած կիրակի օրը` հունիսի 17-ին, 2-սենյականոց 528 բնակարանների բաշխման վիճակահանությունը, ի տարբերություն նախորդների, փորձեցին իրականացնել Գյումրու դպրոցներից մեկի դահլիճում` պատճառաբանելով, որ թատրոնի շենքը այդ օրը զբաղված է: Ի սկզբանե ակնհայտ էր, որ լավագույն տարբերակը ընտրված չէ, ինչի մասին մենք նախքան վիճակահանությունը, արտահայտվել ենք: Եվ քանի, որ «Շիրակ կենտրոնը» վիճակահանությունների կազմակերպման գործում հիմնականում շահառուներին իրազեկողի դերն է ստանձնել և ոչ ամենևին տեխնիկական խնդիրները լուծողի, պատշաճ կերպով բոլոր ընտանիքները իրազեկվեցին: Ի դեպ այդ` 2 սենյականոց բնակարանների բաշխման վիճակահանության ամբողջ ընթացքը ևս առցանց հեռարձակեցինք ու տեսաձայնագրեցինք, որն արդեն տեղադրված է կազմակերպության վեբ կայքում:
Կիրակի օրը դպրոցի դահլիճում, ուր հավաքվել են ավելի քան 1000 գյումրեցիներ, պարզապես անհնարին է եղել 2 սենյականոց բնակարանների բաշխման վիճակահանությունը իրականցնել, այդ պատճառով այն հետաձգվել և տեղափոխվել է «Արագած մարզամշակութային կենտրոնի» դահլիճ, որն անհամամեմատ ավելի ընդարձակ է: Նույն օրը Շիրակի մարզային իշխանությունները վիճակահանության տեխնիկական կողմը չապահովելու և մի իսկական իրարանցում ստեղծելու մեղքը իրենց վրա վերցնելու փոխարեն, աջ ու ձախ սկսել են հայտարարություններով հանդես գալ` փորձելով իրենց անկազմակերպվածության մեղքը բարդել «Շիրակ կենտրոնի» վրա` բերելով անհեթեթ և սին պատճառաբանություններ, այդ թվում մեր կազմակերպության հասցեին հնչեցրել են մի շարք վիրավորական արտահայտություններ: Հիմա, մինչև Շիրակի մարզպետարանի պաշտոնական վեբ-կայքում զետեղված այդ հայտարարությունը առանց կրճատումների և փոփոխությունների մեջ բերելը ուզում ենք նշել, որ դրանում առկա թվային բոլոր տվյալներով հատվածները բառացի արտատպված են «Շիրակ կենտրոնի» մամուլի հաղորդագրություններից:
Կարդացեք նաև
«Տեղի ունեցավ 2 սենյականոց բնակարանների վիճակահանությունը Հունիսի 17-ին Գյումրու Տեքստիլագործների մշակույթի պալատում տեղի ունեցավ, ՀՀ Շիրակի մարզի Գյումրի քաղաքում պետական աջակցությամբ իրականացվող բնակարանային շինարարության ծրագրի շրջանակներում, Գյումրու <Մուշ-2/2> և <Անի> թաղամասերում կառուցվող բազմաբնակարան շենքերի 2 սենյականոց բնակարանների վիճակահանությունը: Վիճակահանությանը մասնակցում էին ՀՀ քաղաքաշինության նախարարի տեղակալ Ավագ Հակոբյանը,Շիրակի մարզպետի տեղակալ Սեյրան Պետրոսյանը, Գյումրու քաղաքապետ Վարդան Ղուկասյանը, փոխքաղաքապետ Գագիկ Մանուկյանը, նախարարության բնակարանների վարչության պետ Եվգենիա Աթայանը, հասարակական կազմակերպությունների և ԶԼՄ ներկայացուցիչներ: Բնակարանների վիճակահանության ողջ ընթացքը, ինչպես նախորդ վիճակահանությունը տեսա-լուսանկարվեց, և ուղիղ հեռարձակվեց <Շիրակ կենտրոն> հ/կ-ի ինտերնետային էջում: Ի տարբերություն նախորդ վիճակահանությունների, երբ նախարարության համապատասխան վարչությունը վիճակահանության մասնակիցների ցուցակը տրամադրում էր մարզպետարանի համապատասխան վարչությանը, բնակիչներին տեղեկացնելու համար, անհասկանալի պատճառներով, ցուցակները նախօրեին տրամադրվել էին <Շիրակ կենտրոն> հ/կ-ին, ով էլ իբր հոգ էր տարել բնակչությանը վիճակահանության մասին իրազեկելու գործում: Դեռևս երկու օր առաջ, երբ դեռ նախարարությունը վերջնականապես չէր որոշել վիճակահանության օրն ու ժամը, <Շիրակ կենտրոնի ղեկավար Վահան Թումասյանը տեղական հեռուստաընկերության ուղիղ եթերաժամին արդեն տեղեկացրել էր բնակչությանը, որ կիրակի օրը, ժամը 12-ին Գյումրու Անի թաղամասի թիվ 11 դպրոցում տեղի կունենա երկու սենյականոց բնակարանների բաշխումը: Այդ տեղեկությունը տեղադրվել էր նաև հիշյալ հ/կ-ի ինտերնետային կայքում: Որպես կանոն վիճակահանությունները տեղի էին ունենում Գյումրու Վ.Աճեմյանի անվան թատրոնում, բայց քանի որ այս վիճակահանությունը չգիտես ինչու խիստ հրատապ դարձավ ժամկետների առումով, որոշվել էր վիճակահանությունը կազմակերպել Գյումրու թիվ 11 դպրոցի դահլիճում, որը սակայն տեղերի առումով շատ քիչ էր և անհարմարմասնակիցների թվի համեմատ: Թե ինչն էր այս վիճակահանության այդչափ հրատափությունը, ոչ մեկը չհասկացավ, և որ կարևորն է ոչ էլ կարոացան մեկնաբանել, թե ինչու ցուցակ չներկայացվեց մարզպետարան, կամ միթե հնարավոր չէր վիճակահանությունն իրականացնել ասենք երկուշաբթի, սովորականի նման թատրոնի շենքում: Միայն, երբ տեսան որ դպրոցում այդքան մարդ հնարավոր չէ տեղավորել, չգիտես ինչու հարգարժան փոխնախարարը ենթադրեց, որ վատ է կազմակերպվել վիճակահանությունը, այլ ոչ թե հրատապ և հ/կ-ի կողմից: Ի դեպ նշենք, որ հ/կ-ի ղեկավարը հենց նույն գիշեր մեկնել էր երկրից, հասկանալի է արտերկիր, հերթական գրանտի շրջանակում: Ստեղված իրավիճակից մի բան էր միայն ակնհայտ, շատերը չէին իրազեկվել ժամանակին կամ ընդհանրապես, շատերն անհասկանալի պատճառներով չեն ընդգրկվել ցուցակ, և ամենակարևորը, մերժվածները տեղյակ չեն եղել, որ իրենք մերժվել են այս կամ այլ պատճառով, խիստ վրդովված էին հատկապես այն բնակիչներն ում նախապես ասել են որ գործերը նորմալ է, բայց չգիտես ինչու չեն հայտնվել ցուցակներում: Հարցի վերաբերյալ պարզաբանում տալով նախարարության բնակարանների վարչության պետ Եվգենիա Աթայանընշեց,-դա այդպես չէ, քաղաքացիները տեղյակ են իրենց բնակարանային գործերից, գիտեն, ով ինչ պակաս փաստաթուղթ ունի, ինչու է մերժվել կամ ինչու չի հայտնվել ցուցակում, ինչ վերաբերվում է քաղաքացիների այսչափ կուտակմանը, այո, մենք ցուցակներն ուղարկել ենք և քաղաքապետարան, և «Շիրակ կենտրոն», պետք էր ընդամենը ճիշտ կազմակերպել 528 ընտանիքների մասնակցությունը, և ոչ թե այսքան մարդհավաքել, ավելացրեց տիկին Աթայանը: Տիկին Աթայանը հավելեց նաև, որ ընդամենը մեկ ամսից տեղի կունենա մեկ սենյականոցների վիճակահանությունը և այս տարվա ծրագիրը կավարտվի, որից հետո, մնացած բոլոր գործերի քննարկումից հետո պարզ կդառնա, որքան քաղաքացի կմնա բնակարանի կարիքավոր:
Երկու սենյականոցների վիճակահանությանը մասնակցում էին շուրջ 650 ընտանիքներ, չնայած, որ ցուցակներում ընդգրկված էին 528-ը: Ինչպես և նախորդ վիճակահանությունների ժամանակ, նախ տեղի ունեցավ առաջին և երկրորդ կարգի 52 հաշմանդամներին առաջին հարկերի բնակարանները հատկացնելու համար վիճակահանությունը, որից հետո տեղի ունեցավ մնացած բնակարանների վիճակահանությունը, որիը տևեց մինչ ուշ երեկո:
Գյումրիում 2012 թ. շահագործման է հանձնվելու 1756 բնակարան, որից Մուշ-2 թաղամասում 33 բնակելի շենք` 1544 բնակարանով, իսկ Անի թաղամասում 5 բնակելի շենք` 212 բնակարանով, այդ թվում` 1 սենյականոց` 640 բնակարան, 2 սենյականոց` 528 բնակարան, 3 սենյականոց` 464 և 4 սենյականոց` 124 բնակարան: Անի թաղամասում 4 սենյականոց բնակարաններ չեն կառուցվել:
Ստորև ներկայացնում ենք «Շիրակ կենտրոն» հ/կ-ի կողմից տրամադրված երկու սենյականոց բնակարանների շահառուների ցուցակը:u_files/2senjak.pdf» :
17.06.2012 https://shirak.gov.am
Ի դեպ հայտարարության մեջ Շիրակի մարզպետարանի այսպես կոչված մեղադրանքները այնքան սին և ծիծաղելի են, որ հիմա չենք էլ ցանկանում անդրադառնալ և այսպես ասած դրանք հերքել, քանի որ առանց դրա էլ այն ընթերցող յուրաքանչյուր խելամիտ անձնավորություն կարող է կարծիք կազմել տողերի հեղինակների մտավոր և մարդկային հատկանիշների մասին: Այստեղ միայն ուզում ենք մեջ բերել ժողովրդական մի հայտնի առած. «Սելը ճռռալու, սելվորն է ճռռում»:
Եվ վերջում «Շիրակ կենտրոնը», ի գիտություն տեղական, մարզային և հանրապետական իշխանությունների, ամենայն պատասխանատվությամբ հայտարարում է, որ ոչինչ չի կարող մեզ խանգարել այսուհետև ևս նույն ջատագովությամբ պաշտպանելու յուրաքանչյուր անօթևան ընտանիքի իրավունքներն ու շահերը:
Ստորև ներկայացնում ենք տեսանյութ, այդ թեմայով «Շիրակ կենտրոնի» նախագահ Վահան Թումասյանի այսօր հրավիրած մամուլի ասուլիսից:
