Այսօր «Արմենիա Մարիոթ» հյուրանոցում Mail. RuGroup-ի «Սոցիալական կայքեր» բիզնես ստորաբաժանման մարքետինգի և ռազմավարական կոմունիկացիաների տնօրեն Ալեքսանդր Իզրյադնովը հայտարարեց, որ «Օդնոկլասնիկի» սոցիալական ցանցից Հայաստանի բնակիչները կարող են օգտվել մայրենի լեզվով, արդեն իսկ հայերեն լեզվով թարգմանվել է կայքի շարժական տարբերակը, իսկ առաջիկա մեկ ամսվա ընթացքում կտեղայնացվի նաև հիմնական կայքը:
«Օդնոկլասնիկի» նախագիծը, որի 100 %-ը պատկանում է Mail. RuGroup-ին, «Հասարակական կարծիք» հիմնադրամի տվյալներով, ռուսաստանյան ամենահայտնի սոցիալական ցանցն է: Liveinternet-ի տվյալներով, դրա օրական լսարանը ավելի քան 33 մլն է:
«Ցանցում այսօր գրանցված են աշխարհում գրեթե բոլոր մարդիկ, ի տարբերություն «ֆեյսբուքի»` «օդնոկլասնիկի» կայքից Հայաստանում ավելի շատ են օգտվում, երբ երիտասարդները միացնում են համացանցը, միանգամից մտնում են «օդնոկլասնիկի»: Այն ամենաճանաչված կայքն է Հայաստանում: Վիճակագրության համաձայն, «օդնոկլասնիկիից» օգտվում են հայ տղամարդկանց 60 %-ը, իսկ կանանց 40%-ը»,- փաստում է Ալեքսանդր Իզրյադնովը:
Բանախոսը նշեց, որ կայքը օր օրի թարմացվում է, էջի ձևավարմամբ զբաղվում են մասնագետները: Ըստ նրա, ցանցը հնարավորություն է տալիս անվճար շփվել ընկերների, բարեկամների, ծանոթ ու անծանոթ մարդկանց հետ, խաղեր խաղալ, վիդիոներ ու հետաքրքրաշարժ ինֆորմացիաներ քաղել:
Կարդացեք նաև
«Բջջային օպերատորների տարբերակը ավելի օգտագործվող է, և հայերենի գերխնդիրը դրվել է հենց բջջայինների համար: Հայերեն տարբերակով մարդիկ ավելի պարզ կծանոթանան իրենց առջև դրված կայքի խնդիրներին կամ նորություններին, այն հասկանալի կլինի ամենահասարակ մարդու համար: Մենք տեսնում ենք թե ինչպես է աճում ինտերնետ օգտագործողների ակտիվությունը Հայաստանում, և արել ենք ամեն հնարավորը, որպեսզի մեր սոցիալական ցանցում յուրաքանչյուրը կարողանա շփվել իր ծանոթների և ընկերների հետ իր մայրենի լեզվով»,-հավելում է մասնագետը:
«Օդնոկլասնիկիի» տեղայնացումը կընթանա երկու փուլով. հայերեն լեզվով արդեն հասանելի է կայքի շարժական տարբերակը, իսկ մոտ ժամանակներում լիովին կթարգմանվի նաև հիմնական կայքը:
Անժելա ՇԱՀՈՒՄՅԱՆ
