Նախկինում նշել ենք Տավուշի մարզպետարանի ինտերնետային կայքում (www.tavush.gov.am) տեղ գտած սխալների մասին: Կայքի «Համայնքներ» բաժնում տեղեկություններ են զետեղված մարզի 62 համայնքների վերաբերյալ: Վերին Ծաղկավան համայնքի մասին, ի մասնավորի, նշված է հետեւյալը. «Գյուղը բավական երիտասարդ է,այն հիմնադրվել է 1900թ.՝ հարեւան Վարագավանից տեղափոխված բնակիչների կողմից»: Տավուշի մարզում համայնքներ կան, որոնք 40- 50 տարվա պատմություն ունեն, նույն տրամաբանությամբ նրանց մասին կայքում պետք է գրվեր՝ «պատանի»: Կայքի նույն էջի վերեւում Վերին Ծաղկավանի բնակչության թիվը նշված է 996( կողքին չի գրված՝ մարդ կամ բնակիչ), իսկ էջի ներքեւում նշված է՝ «բնակչության թիվը` 981մարդ»: Ո՞ւր «կորան» գյուղի 15 բնակիչները: Վերին Ծաղկավանի ամառվա միջին ջերմաստիճանը նշված է՝ «+290C», իսկ ձմռան միջին ջերմաստիճանը`«-30C»: Աստիճանի նշանի փոխարեն գրվել է 0, եւ ստացվել է, որ Բերդի տարածաշրջանի Վերին Ծաղկավանի բնակիչներն ապրում են Մարս մոլորակի ջերմային ռեժիմով: Տավուշի մարզպետարանի ինտերնետային կայքի ստորին հատվածում նշված է. «Կայքը ստեղծվել է ԱՄՆ Միջազգային զարգացման գործակալության (ԱՄՆ ՄԶԳ) աջակցությամբ: Այստեղ արտահայտված տեսակետները ՀՀ տարածքային կառավարման նախարարությանն են եւ պարտադիր չէ, որ համընկնեն ԱՄՆ ՄԶԳ կամ ԱՄՆ կառավարության տեսակետներին»: Կարծում ենք, որ ՀՀ տարածքային կառավարման նախարարությանը պետք է հետաքրքրի, թե ինչ «տեսակետներ» է պարունակում Տավուշի մարզպետարանի կայքը: Հավելենք, որ Վերին Ծաղկավանին վերաբերող հակիրճ տեղեկությունների մեջ բազմաթիվ են նաեւ կետադրական սխալները:
Ոսկան Սարգսյան
Կարդացեք նաև
