Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանում դատավոր Արսեն Մկրտչյանի նախագահությամբ, այսօր շարունակվեց ոստիկանության կազմակերպված հանցավորությունների դեմ պայքարի գլխավոր վարչության օպեր-լիազոր Մուրադ Բաղդասարյանի եւ ոչ մի տեղ չաշխատող Տիգրան Հակոբյանի դեմ հարուցված քրեական գործի դատաքննությունը:
Վկաներից ցուցմունք տվեց տուժող ճանաչված Գեորգի Պետրոսյանի կինը, որը հայտնեց, թե Տիգրանն իր եւ ամուսնուց ստացել է 23 000 դոլար գումար հայտնի նկարիչների ստեղծագործություններ բերելու համար: Սակայն ոչ միայն նկարները չի բերել, այլ՝ գումարը մինչ օրս չի վերադարձրել: Վկան ասաց, որ Տիգրան Հակոբյանը նկարի փոխարեն «անծանոթ նկարչի պլակատ» էր բերել:
Մեղադրող Աշոտ Նադոյանը հրապարակեց վկա Գեւորգ Թախվերդյանի 2010 թ. հունվարի 24-ի նախաքննության ժամանակ տրված ցուցմունքը/ Վկան հիվանդանոցում էր գտնվում, ինսուլտով-Ռ.Մ./:
Ըստ այդ ցուցմունքի, Գեորգի Պետրոսյանն իրեն ասել է, որ Տիգրանը խոստացել է հայտնի նկարիչների գործեր ձեռք բերել, այդ նպատակով 23 000 դոլար գումար է տվել: Հրապարակվեց նաեւ վկա Դավիթ Եգանյանի ցուցմունքը, որին առարկեց պաշտպանական կողմը, դատարանին մեղադրելով, որ զրկում է դրանով իսկ հարցեր տալու իրավունքից:
Կարդացեք նաև
Այս վկան հայտնել էր, որ ոսկյա զարդեր էր վերցրել Տիգրանն իրենցից, Թուրքիայում պայմանագրեր կնքելու, եւ իր վատ վիճակը բարելավելու համար:
Ապա տիրացել էր զարդերին:
Դատարանն ավարտեց վկաների հարցաքննությունը, ապա հետազոտեց գործում առկա ապացույցները:
Այնտեղ ամբաստանյալների բնակարաններից խուզարկության ժամանակ առգրավված հեռախոսներն էին, գաղտնալսման արձանագրությունները, որոնք ձեռք էին բերվել Կենտրոն եւ Նորք-Մարաշ վարչական շրջանների ընդհանուր իրավասության դատարանի որոշմամբ, բնութագրերը: Ի դեպ, «Արիության մեդալի» արժանացած Մուրադ Բաղդասարյանի ծառայողական բնութագիրը տրված էր անձամբ իր պետի՝ Հ.Պողոսյանի կողմից: Նա համարվում է թմրամիջոցների ապօրինի ձեռքբերման դեմ պայքարի լավագույն օպերատիվ աշխատողներից մեկը, որը ըստ այդ բնութագրի, գիտի «ծառայողական գաղտնիքը փակ պահել»:
Հաջորդ դատական նիստին ցուցմունք են տալու Մուրադ Բաղդասարյանն ու Տիգրան Հակոբյանը:
Ռուզան ՄԻՆԱՍՅԱՆ
