Այսօր Գյումրու «Տիրամայր Հայաստան» կոչվող համալիրում, որը գյումրեցիների շրջանակում ավելի շատ հայտնի է կուսանոց անվամբ, բուժաշխատողի օրվա կապակցությամբ, ճոխ սեղաններով, համերգային ծրագրով, սիմֆոնիկ նվագախմբի ուղեկցությամբ մեծարեցին շիրակցի բժիշկներին: Մի քանիսին պարգևատրեցին Հիպոկրատի երդմանը հավատարիմ մնալու ու բնակչությանը բարձր որակի ծառայություն մատուցելու համար:
Մեր ֆոտոխցիկը այս տոնական տրամադրության ֆոնին մի տխուր փաստ արձանագրեց. դահլիճում նստած բուժաշխատողների մեծ մասը տարեց մարդիկ էին, նոր դեմքեր գրեթե չկային: Եվ երբ այս մասին փորձեցինք կիսվել դահլիճի մի անկյունում հավաքված բժիշկների հետ, վերջիններս հավաստիացրին, որ սկսվել է գյումրեցի բժիշկների արտագաղթ: Ըստ մեր զրուցակիցների, Ռուսաստանի Դաշնության կողմից իրականացվող «Հայրենակիցներ» ծրագրից օգտվողները հենց գյումրեցի բժիշկներն են, որոնք մեկը մյուսի հետևից ընտանիքներով լքում են Հայաստանը: «Զարմանալու ոչինչ չկա, օրինակ` Մոսկվայում շտապօգնության բժշկի աշխատավարձը 2300 դոլարից է սկսվում, Սանկտ-Պետերբուրգում` 1800 դոլարից, իսկ մեր մո՞տ: Ուղղակի ցավն այն է, որ արտագաղթող բժիշկները, իրենց գործընկերների հետ խորհրդակցելով, պատճառ են դառնում, որ մյուսներն էլ օգտվեն ռուսական այդ ծրագրից ու հեռանան: Վաղը, մյուս օրը Գյումրին կդառնա որակյալ բժշկի կարոտ», -ցավով նշեց բուժհաստատություններից մեկի տնօրենը:
Նունե ԱՐԵՎՇԱՏՅԱՆ
Կարդացեք նաև
