Հայ խոհարարական ավանդույթների զարգացման ու պահպանման հ/կ նախագահ Սեդրակ Մամուլյանը, նույն հ/կ քարտուղար, գրող-հրապարակախոս Վահե Անթանեսյանը եւ «Ոսկե ծիրան» կինոփառատոնի միջոցառումների կազմակերպիչ Վարդան Հակոբյանն այսօր «Արմատ» ակումբում խոսեցին «Ոսկե ծիրան» միջազգային կինոփառատոնի եւ «Տոլմայի փառատոնի» համագործակցության մասին:
Հուլիսի 11-ին Սարդարապատում երկրորդ անգամ կկայանա Տոլմայի համահայկական փառատոնը: Վերջինիս կազմակերպիչ Մամուլյանը այսպես ստուգաբանեց տոլմա բառը՝ այն նշանակում է խաղողի վազ:
Վարդան Հակոբյանն էլ նշեց, որ այս «Ոսկե ծիրանի» շրջանակներում եւս Հայաստանում կլինեն շուրջ 200 օտարերկրացի կինոգործիչներ, ովքեր ցանկանում են ծանոթանալ հայկական մշակույթին. «Դրա լավագույն ձևերից մեկն էլ ազգային խոհանոցն է: Անցած տարի հյուրերը «Տոլմայի փառատոնից» մեծ տպավորություններով են հեռացել»:
«Հայ խոհարարական ավանդույթների զարգացման ու պահպանման» հ/կ քարտուղար Վահե Անթանեսյանը ասում է, որ այս տարի «Տոլմայի փառատոնը» ստացել է 30 հայտ, անցյալ տարվա 22-ի փոխարեն. «Անցյալ տարի ներկայացվել էր տոլմայի 60 տարատեսակ, կարծում եմ՝ այս տարի ավելի շատ կլինի»:
Անթանեսյանի կարծիքով` փառատոնը հնարավորություն է տալիս տոլման օտարումից փրկել, մանավանդ հարեւան երկրներից շատերը այն յուրացնելու միտում ունեն. «Պատահական չէ, որ փառատոնը Սարդարապատում ենք անցկացնում, փառատոնն էլ պայքարի մի միջոց է»:
Եվա ՀԱԿՈԲՅԱՆ
