«Իշխանությունն ուզում է ընդդիմության հացը կտրել»,-այսօր հայտարարեց «Ժառանգություն» կուսակցության վարչության փոխնախագահ Արմեն Մարտիրոսյանը՝ անդրադառնալով իշխանության այն մոտեցմանը, որ մշտապես խոսում է այնպես, թե տեղյակ է խնդիրներից:
Վերլուծելով ՀՀ կառավարության ներկայացրած ծրագիրը, պարոն Մարտիրոսյանը նշեց. « Հնարավոր չեմ համարում, որ այս ծրագիրը կյանքի կոչվի: Ամենայն հավանականությամբ 2013-ին նոր կառավարություն ենք ունենալու, Սերժ Սարգսյանի խոսքը հենց դրան էր վերաբերում»:
Վերլուծելով ծրագրի կոնկրետ դրույթներ՝ Ա. Մարտիրոսյանը նկատեց. «Ծրագրում նշված է ինստիտուցիոնալ բարեփեխումների մասին: Այդ բարեփոխումներն ինչպե՞ս են իրականացվելու, եթե խոշոր բիզնեսների գլխին կանգնած են հենց իշխանության ներկայացուցիչները: Ո՞վ պետք է իրականացնի բարեփոխումները. Օլիգարխնե՞րը, որ այս խորհրդարանում են: Խոսվում է նաև մարդկային կապիտալի զարգացման մասին: Մի հասարակությունում, որտեղ դուք հիասթափություն, սոցիալական և իրավական անարդարություն եք սերմանել, որի արդյունքում քաղաքացին արտագաղթում է, ի՞նչ մարդկային կապիտալի զարգացման մասին է խոսքը: Մարդիկ մութ ու ցուրտ տարիներին, պատերազմի տարիներին մնացին Հայաստանում, սակայն այսօր արտագաղթում են»:
Կարդացեք նաև
Կառավարության ծրագրի այն դրույթը, թե պետությունը պարտավոր է քաղաքացիների համար արժանապատիվ կյանք ապահովել, արժանացան Ա. Մարտիրոսյանի սուր քննադատությանը. «10 հազար դրամ ընտրակաշառքի միջոցով ձևավորված խորհդարանը և այդ խորհրդարանի կողմից ձևավորված կառավարությունը չպետք է խոսի արժանապատվության մասին, քանի որ արժանապատվությունը չի գնվում»:
Վերլուծելով ԲՀԿ-ի պահվածքը, մասնավորապես, որ իրեն ընդդիմության չհայտարարեց, Ա. Մարտիրոսյանը նշեց. « ԲՀԿ-ն կարծես թե դեմ է հենց կառավարությանը, կոնկրետ վարչապետի անձին, ոչ թե իշխանությանը, քանի որ այդ դեպքում նա իրեն ընդդիմություն կհայտարարեր: Իր թվակազմով ԲՀԿ-ն երկրորդ կուսակցությունն է: Պարզ է , որ այդ թվակազմը ունենալով՝ նրանք իրենց ներսում մտածել են, որ կարող են հավակնել վարչապետական պաշտոնին: Բայց երկրի առանցքային պաշտոնները հենց Հանրապետականի ձեռքին են: Ուստի կարելի է եզրակացնել որ հենց այդ հանգամանքով էլ պայմանավորված է, որ ԲՀԿ-ն կոալիցիա չմտավ»:
Տաթև ՀԱՐՈՒԹՅՈՒՆՅԱՆ
