Խորհրդարանում երեկ բոլորովին այլ մթնոլորտ էր, այլ իրավիճակ։ Ու հիմնական պատճառը, թերեւս, Հայ ազգային կոնգրեսի պատգամավորների ներկայությունն էր նիստերի դահլիճում։ Առավոտյան խորհրդարանը սկսեց նոր ձեւավորված կառավարության ծրագրի քնարկումը։ Այնտեղ էր կառավարության ողջ կազմը, բացակա պատգամավորները շատ քիչ էին։ Լրագրողները, որ նախկինում իրենց օթյակներում շատ քիչ էին լինում եւ նիստերի ընթացքին առանձնապես չէին հետեւում, քանի որ դրանք հիմնականում չափազանց ձանձրալի էին, երեկ օթյակներից գրեթե դուրս չէին գալիս։ Իրար փոխարեն կոճակ սեղմելու, հորանջող եւ ձանձրացող դեմքեր տեսնելու փոխարեն, տարիների ընդմիջումից հետո երեկ խորհրդարանում ընթացավ շատ հետաքրքիր քաղաքական քննարկում։ Նիստերի դահլիճը, որ նիստերի միայն առաջին՝ առավելագույնը 30 րոպեների ընթացքում էր լիքը լինում, երեկ մինչեւ աշխատանքային օրվա ավարտը՝ ժամը 18.00-ն, լիքն էր ու Կոնգրեսի պատգամավորները, ինչպես նաեւ խորհրդարանական մյուս երեք ուժերի՝ ԲՀԿ-ի, ՀՅԴ-ի եւ §Ժառանգության¦ պատգամավորները պարզապես ջախջախեցին կառավարության ծրագիրը։
«Հայկական ժամանակ»
