Ամառ է: Այն բացի տաք եղանակից, լավ է նաեւ նրանով, որ Հայաստան են ժամանում զբոսաշրջիկները: Ի ուրախություն մեզ, այս տարին եւս բացառություն չէ: Վերջերս քաղաքում շրջելիս, մարդկանց մոտ հարց է առաջանում` արդյոք Հայաստանում ենք: Պատճառը`հարեւան երկրից` Իրանից ժամանած զբոսաշրջիկներն են, ովքեր կարծես երեւանցիներից շատ են: Դրա վառ ապացույցը Հանրապետության հրապարակն է: Ողջ օրվա ընթացքում, հատկապես երեկոյան, նրանք այնտեղ են. նստում ու հիանում են «երգող» շատրվաններով, իսկ վերջում էլ նկարվում են:
Իրանցիների այս քայլերը ողջունելի է, բայց երբ մի քիչ էլ ես առաջանում ու տեսնում շքեղ մեքենաներն ու «թվանոց» տաքսիները, սկսում ես մտածել`իսկ մե՞ր` հայերիս քայլերը: Նշված վայրում, բացի այս ամենից, կարող ենք հանդիպել պարսկերեն լեզվով գովազդներ, որտեղ առաջարկվում է ակումբային խնջույքից մինչեւ ժամավճարով մեքենա:
Վիճակն ավելի է վատանում ուշ գիշերին, երբ իրենց աշխատանքն են սկսում «հայ աղջիկները»: Նրանք «կպցնում» են իրանցի տղաներին ու այդպես հարստացնում թե տաքսիստներին, եւ թե հյուրանոցների տերերին:
«Օրինակ` մենակ երեկ գիշեր երկու աղջիկ ու երկու տղա եմ տարել Զովունու հյուրանոց: Առաջին օրերին ինչքան եմ տարել` չեմ հիշում»,- ասում է այս օրերին իրանցիների անբաժան ընկեր, վարորդ Հրայրը: Տարիքով մեծ այս մարդը ճիշտ է իր աշխատանքն է կատարում, բայց անկեղծանում է. «Պարսիկներին տանում եմ ավելի թանկով, քան սովորական պատվերի ժամանակ»: Նա նույնպես համաձայնվում է այն մտքի հետ, որ իրեն օգուտ բերելով գցում է հայերի պատիվը: Չնայած այդ ամենին, ասում է. «Տես` ինչքա~ն տաքսի կա, բոլորն էլ անում են, իսկ ես ետ ձեւով ավել փող եմ տանում տուն: Լավ օրից չէ, որ մենք` տաքսիստներս, տենց ենք անում»:
«Առավոտ երիտասարդականն» իր շրջայցի ժամանակ «հայ աղջիկներ»-ից պարզեց, որ իրանցիներին բավարարելու համար պահանջում են «շատ չնչին» գումար` 15-20 հազար դրամ : «Մենք գին չենք ասում սկզբում, չնայած` իրենց գինը չի հետաքրքրում»,– մեզ հետ զրույցում նշեց Արմինեն, ով մեծ դժվարությամբ ներկայացավ: Այստեղ տեղին է հիշել այս ասացվածքը. «Ինչ մտքովդ անցի տուր, բայց լավ կլինի մտքովդ մի 15 հազար անցնի :D»:
Ավելացնեմ նաեւ, որ Նարինեն, ի տարբերություն մյուսների, հաճախորդ էր որսում կեսօրին:
Արամ Արարատյան
